കാണാത്ത കാഴ്ചകളുമായി ബറോസ് ഒരുങ്ങുന്നു; പ്രോമോ ടീസർ കാണാം..!

മലയാളത്തിന്റെ മഹാനടൻ മോഹൻലാൽ ആദ്യമായി സംവിധാനം ചെയ്യുന്ന ചിത്രമാണ് ബറോസ്: നിധി കാക്കും ഭൂതം. ഈ വർഷം ആദ്യം ഷൂട്ടിംഗ് തുടങ്ങിയ ഈ ചിത്രം പത്തു ദിവസം ഷൂട്ട് ചെയ്തപ്പോഴേക്കും കോവിഡ് രണ്ടാം തരംഗം ആരംഭിക്കുകയും ഷൂട്ടിംഗ് മുടങ്ങുകയും ചെയ്തു. ഇപ്പോഴിതാ ഇന്ന് മുതൽ ഈ ചിത്രം വീണ്ടും ആരംഭിച്ചിരിക്കുകയാണ്. താരനിരയിൽ ചില മാറ്റങ്ങൾ വന്നതിനാൽ ആദ്യം മുതലാണ് ചിത്രം ആരംഭിക്കുന്നത്. ഏതായാലും ചിത്രത്തിന്റെ ഒരു പ്രോമോ ടീസർ ഇന്ന് പുറത്തു വിട്ടിരിക്കുകയാണ് അണിയറ പ്രവർത്തകർ. ഒരു ത്രീഡി ഫാന്റസി ഡ്രാമയായി വമ്പൻ ബഡ്ജറ്റിൽ ഒരുങ്ങുന്ന ഈ ചിത്രം രചിച്ചിരിക്കുന്നത് ജിജോ പുന്നൂസും നിർമ്മിക്കുന്നത് ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂരുമാണ്. മോഹൻലാൽ നായക വേഷത്തിലെത്തുന്ന ഈ ചിത്രത്തിൽ മറ്റൊരു പ്രധാന വേഷത്തിലെത്തുന്നത് മായ എന്ന പെൺകുട്ടിയാണ്.

ഇവരെ കൂടാതെ ഈ ചിത്രത്തിലെ താരങ്ങളിൽ കൂടുതൽ പേരും സ്പെയിൻ, അമേരിക്ക, ഘാന, പോർട്ടുഗൽ എന്നിവിടങ്ങളിൽ നിന്നുള്ളവരാണ്. വി എഫ് എക്സ്ഉം ആക്ഷനും എല്ലാം നിറഞ്ഞ ഈ ചിത്രത്തിൽ നാനൂറു വർഷം പ്രായമുള്ള ബറോസ് എന്ന് പേരുള്ള ഒരു ഭൂതമായാണ് മോഹൻലാൽ അഭിനയിക്കുന്നത്. സന്തോഷ് ശിവൻ ക്യാമറ ചലിപ്പിക്കുന്ന ഈ ചിത്രത്തിന് സംഗീതം ഒരുക്കുന്നത് ലിഡിയൻ നാദസ്വരവും എഡിറ്റ് ചെയ്യുന്നത് ശ്രീകർ പ്രസാദുമാണ്. പൃഥ്വിരാജ് സുകുമാരൻ ആദ്യം ഈ ചിത്രത്തിൽ അഭിനയിച്ചു തുടങ്ങിരുന്നു എങ്കിലും ചിത്രം നീണ്ടു പോയതോടെ ഡേറ്റിൽ പ്രശ്നങ്ങൾ വരികയും പ്രിത്വിരാജിന് പിന്മാറേണ്ടി വരികയും ചെയ്തു എന്നാണ് റിപ്പോർട്ടുകൾ പറയുന്നത്. അതുപോലെ മിന്നൽ മുരളിയിലെ സൂപ്പർ വില്ലൻ ആയി തകർത്താടിയ ഗുരു സോമസുന്ദരവും ഈ ചിത്രത്തിൽ അഭിനയിക്കുന്നുണ്ട്.