ഒരു ഗാനരഗത്തിനായി മാത്രം ഒരു കോടി; മൈ സാന്റായിലെ ബ്രഹ്മാണ്ഡ ഗാനമിതാ

മലയാളി സിനിമാ പ്രേക്ഷകർക്ക് ഇത്തവണത്തെ ക്രിസ്മസ് ഉത്സവമാക്കി തീർത്തു കൊണ്ടാണ് ജനപ്രിയ നായകൻ ദിലീപ് കഴിഞ്ഞ ദിവസം തന്റെ മൈ സാന്റാ എന്ന ചിത്രവുമായി എത്തിയത് . ദിലീപിനെ നായകനാക്കി ഹിറ്റ് സംവിധായകൻ സുഗീത് ഒരുക്കിയ ഈ ഫാമിലി എന്റെർറ്റൈനെർ ഇപ്പോൾ ഗംഭീര പ്രേക്ഷക പ്രതികരണം നേടിയെടുത്തു കൊണ്ട് തീയേറ്ററുകളിൽ മുന്നേറുകയാണ്. ദിലീപ് ഒരു ക്രിസ്മസ് അപ്പൂപ്പനായി എത്തുന്ന ഈ ചിത്രം ഒരു ഫാന്റസി ചിത്രം എന്ന നിലയിലും പ്രേക്ഷകരെ ആകർഷിക്കുന്നുണ്ട്. രണ്ടാം ക്ലാസ്സിൽ പഠിക്കുന്ന ഏഴു വയസുള്ള ഒരു പെൺകുട്ടിയും സാന്താ ക്ലോസും തമ്മിൽ ഉള്ള ബന്ധമാണ് ഈ ചിത്രം നമ്മുടെ മുന്നിൽ എത്തിക്കുന്നത്.

ഇപ്പോഴിതാ ഒരു കോടി രൂപ ബഡ്ജറ്റിൽ ചിത്രീകരിച്ച ഈ ചിത്രത്തിലെ ഒരു ഗാനത്തിന്റെ വീഡിയോ റിലീസ് ചെയ്തിരിക്കുകയാണ് അണിയറ പ്രവർത്തകർ. സാന്റാ ക്ലോസിനൊപ്പം ഐസ എന്ന് പേരുള്ള കൊച്ചു പെൺകുട്ടി നടത്തുന്ന ഒരു അത്ഭുത യാത്രയാണ് ഈ ഗാനത്തിൽ ആവിഷ്കരിച്ചിരിക്കുന്നത്.വി എഫ് എക്സ്ഉം രസകരമായ വരികളും മനോഹരമായ ഈണവും ഈ ഗാനത്തെ പ്രേക്ഷകരുടെ പ്രീയപ്പെട്ടതാക്കുന്നു. ഫൈസൽ അലി ഒരുക്കിയ ഗംഭീര ദൃശ്യങ്ങൾ ആണ് ഈ ഗാനത്തിന്റെ ഏറ്റവും വലിയ ഹൈലൈറ്റ്. അതോടൊപ്പം ദിലീപ്, ബാലതാരം ഐസ എന്നിവരുടെ പ്രകടനം കൂടിയായപ്പോൾ ഓ ബുള്ളെമ എന്ന് തുടങ്ങുന്ന ഈ ഗാനം അതിമനോഹരമായി മാറി.

നവാഗതനായ ജെമിൻ സിറിയക് തിരക്കഥ രചിച്ച ഈ ചിത്രം വാള്‍ പോസ്റ്റര്‍ എന്റര്‍ടെയ്ൻമെന്റ്സ് എന്ന പുതിയ ബാനറിൽ സംവിധായകൻ സുഗീത്, പ്രശസ്ത രചയിതാവ് നിഷാദ് കോയ, അജീഷ് ഒ.കെ സാന്ദ്ര മരിയ ജോസ് എന്നിവർ ചേർന്നാണ് നിർമ്മിച്ചിരിക്കുന്നത്. ദിലീപിനൊപ്പം ഒരു വലിയ താര നിര അണിനിരക്കുന്ന ഈ ചിത്രം കോമെഡിയും ഫാന്റസിയും വൈകാരിക മുഹൂർത്തങ്ങളുമെല്ലാം ചേർന്ന ഒരു കംപ്ലീറ്റ് ഫാമിലി എന്റെർറ്റൈനെർ ആയാണ് ഒരുക്കിയിരിക്കുന്നത്.

വിദ്യ സാഗർ സംഗീതം പകർന്ന ഗാനങ്ങൾ ഈ ചിത്രത്തിന്റെ ഹൈലൈറ്റ് ആണ്. സണ്ണി വെയ്ൻ, സിദ്ദിഖ്, സായി കുമാർ, അനുശ്രീ, ധർമജൻ ബോൾഗാട്ടി, ഇന്ദ്രൻസ്, കലാഭവൻ ഷാജോൺ തുടങ്ങിയവർ ആണ് ഇതിന്റെ താര നിരയിൽ ഉള്ള പ്രമുഖ നടീനടന്മാർ. കാർത്തിക്, ഹന്നാ രജി എന്നിവർ ചേർന്ന് ആലപിച്ച ഓ ബുള്ളെമ എന്ന ഗാനം രചിച്ചിരിക്കുന്നത് സന്തോഷ് വർമ്മ ആണ്