ഒറ്റക്കൊരു കാമുകനിലെ ആദ്യ ഗാനം എത്തി; ചിത്രം റിലീസിന് ഒരുങ്ങുന്നു..!

അജിൻ ലാൽ , ജയൻ വന്നേരി എന്നീ നവാഗതർ ചേർന്ന് സംവിധാനം ചെയ്ത ഒറ്റക്കൊരു കാമുകൻ എന്ന ചിത്രത്തിലെ ആദ്യ വീഡിയോ സോങ് റിലീസ് ചെയ്‌ത്‌ കഴിഞ്ഞു. ആത്മാവിൽ എന്ന് തുടങ്ങുന്ന ഈ ഗാനത്തിന് സംഗീതം പകർന്നിരിക്കുന്നത് വിഷ്ണു മോഹൻ സിത്താരയാണ്. ബി കെ ഹരിനാരായണൻ വരികൾ എഴുതിയിരിക്കുന്ന ഈ ഗാനം ആലപിച്ചിരിക്കുന്നത് ജ്യോത്സന രാധാകൃഷ്ണനും സച്ചിൻ രാജ് എന്ന ഗായകനും ചേർന്നാണ്. മികച്ച ദൃശ്യങ്ങളും ഈ മെലഡിയുടെ പ്രത്യേകതയാണ്. സഞ്ജയ് ഹാരിസ് ആണ് ഈ ചിത്രത്തിന് വേണ്ടി ദൃശ്യങ്ങൾ ഒരുക്കിയിരിക്കുന്നത്. ജോജു ജോർജ്, ഷൈൻ ടോം ചാക്കോ, ഭഗത് മാനുവൽ, ഷഹീൻ സിദ്ദിഖ്, വിജയ രാഘവൻ, കലാഭവൻ ഷാജോൺ , ശാലു റഹിം എന്നിവർ പ്രധാന വേഷങ്ങളിൽ എത്തുന്ന ഈ ചിത്രം അധികം വൈകാതെ തന്നെ പ്രദർശനത്തിന് എത്തുമെന്നാണ് റിപ്പോർട്ടുകൾ പറയുന്നത്.

അഭിരാമി, ലിജോ മോൾ ജോസ് , അരുന്ധതി നായർ എന്നിവരാണ് ഈ ചിത്രത്തിലെ പ്രധാന സ്ത്രീ കഥാപാത്രങ്ങളെ അവതരിപ്പിക്കുന്നത്. ഇറോസ് ഇന്റർനാഷണൽ കേരളത്തിൽ വിതരണം ചെയ്യുന്ന ഈ ചിത്രം നിർമ്മിച്ചിരിക്കുന്നത് ഡാസ്ലിങ് മൂവി ലാൻഡ് പ്രൊഡക്ഷൻസിന്റെ ബാനറിൽ പ്രിൻസ് ഗ്ലെറിയൻസ്, സാജൻ യശോധരൻ, അനൂപ് ചന്ദ്രൻ എന്നിവർ ചേർന്നാണ്. എസ് കെ സുധീഷ്, ശ്രീകേശ് കുമാർ എന്നിവർ ചേർന്ന് തിരക്കഥ രചിച്ചിരിക്കുന്ന ഈ ചിത്രം എഡിറ്റ് ചെയ്തിരിക്കുന്നത് സനൽ രാജ് ആണ്. ഒറ്റക്കൊരു കാമുകന്റെ പശ്ചാത്തല സംഗീതം ഒരുക്കിയിരിക്കുന്നതും വിഷ്ണു മോഹൻ സിതാര തന്നെയാണ്. ഒരു ഫാമിലി എന്റെർറ്റൈനെർ ആയി ഒരുക്കിയിരിക്കുന്ന ഈ കൊച്ചു ചിത്രത്തിന്റെ പോസ്റ്ററുകളും ഇപ്പോൾ പുറത്തു വന്ന ഈ ഗാനവും സോഷ്യൽ മീഡിയയുടെ ശ്രദ്ധ നേടിയെടുക്കുന്നുണ്ട്.