ആ നല്ല നാളിനി തുടരുമോ; വിനീത് ശ്രീനിവാസന്റെ ശബ്ദത്തിൽ മനോഹര ഗാന ടീസർ..

നവാഗതനായ പ്രവീൺ രാജ് പൂക്കാടൻ സംവിധാനം ചെയ്യുന്ന വെള്ളേപ്പം എന്ന ചിത്രത്തിലെ മനോഹരമായ ഒരു ഗാനത്തിന്റെ ടീസറാണ് ഇപ്പോൾ സോഷ്യൽ മീഡിയയുടെ ശ്രദ്ധ നേടിയെടുക്കുന്നത്. ആ നല്ല നാളിനി തുടരുമോ എന്ന വരികളോടെ തുടങ്ങുന്ന ഈ ഗാനത്തിന് ഈണം പകർന്നിരിക്കുന്നത് എറിക് ജോൺസണും വരികളെഴുതിയിരിക്കുന്നതു ദിനു മോഹനുമാണ്. ജിൻസ് തോമസ്, ദ്വാരക് ഉദയശങ്കർ എന്നിവർ ചേർന്ന് നിർമ്മിച്ചിരിക്കുന്ന ഈ ചിത്രത്തിലെ പ്രധാന വേഷങ്ങൾ ചെയ്യുന്നത് പതിനെട്ടാം പടി എന്ന ചിത്രത്തിലൂടെ ശ്രദ്ധ നേടിയ അക്ഷയ് രാധാകൃഷ്ണനും ഒരു അഡാർ ലവ് എന്ന ചിത്രത്തിലൂടെ ശ്രദ്ധേയയായ നൂറിൻ ഷെരീഫുമാണ്. റോമ, ഷൈൻ ടോം ചാക്കോ എന്നിവരുമഭിനയിക്കുന്ന ഈ ചിത്രത്തിന്റെ പോസ്റ്ററുകൾ ഏറെ ശ്രദ്ധ നേടിയെടുത്തിരുന്നു. ഇപ്പോൾ വിനീത് ശ്രീനിവാസന്റെ ശബ്ദത്തിലെത്തിയ പുതിയ ഗാനത്തിന്റെ ടീസറും ശ്രദ്ധ നേടിയതോടെ ചിത്രത്തെ കുറിച്ചുള്ള പ്രേക്ഷക പ്രതീക്ഷകൾ വർധിക്കുകയാണ്.

നവാഗതനായ ജീവൻ ലാൽ തിരക്കഥ രചിച്ച ഈ ചിത്രത്തിന് കാമറ ചലിപ്പിക്കുന്നത് ശിഹാബ് ഓങ്ങല്ലൂർ ആണ്. രഞ്ജിത്ത് ടച് റിവർ എഡിറ്റിംഗ് നിർവഹിക്കുന്ന ഈ ചിത്രം ഈ വർഷം തന്നെ പ്രദർശനത്തിനെത്തും. അക്ഷയ് രാധാകൃഷ്ണൻ അവതരിപ്പിക്കുന്ന നായക കഥാപാത്രത്തിന്റെ സഹോദരിയായി അഭിനയിച്ചു കൊണ്ട് റോമ തിരിച്ചു വരുമ്പോൾ ഷൈൻ ടോം ചാക്കോ ഒരു കമ്മ്യൂണിസ്റ്റ് ലീഡർ ആയാണ് ഈ ചിത്രത്തിലെത്തുന്നത്. ഫാന്റസി എലമെന്റുകൾ നിറഞ്ഞ ഒരു റൊമാന്റിക് കോമഡി എന്റെർറ്റൈനെർ ആയാണ് ഈ ചിത്രമൊരുക്കുന്നത് എന്നാണ് സൂചന. ശ്രീജിത്ത് രവി, തണ്ണീർ മത്തൻ ദിനങ്ങൾ എന്ന ചിത്രത്തിലൂടെ ശ്രദ്ധ നേടിയ വൈശാഖ് രാജൻ, ജൂൺ എന്ന ചിത്രത്തിലൂടെ ശ്രദ്ധിക്കപ്പെട്ട ഫാഹിം സഫർ എന്നിവരും ഈ ചിത്രത്തിന്റെ താരനിരയിലുണ്ട്.