സുഹൃത്തിന്റെ കല്യാണത്തിൽ തിളങ്ങി ഫഹദും നസ്രിയയും; കിടിലൻ ഡാൻസുമായി താരങ്ങൾ

താര ദമ്പതികളായ ഫഹദ് ഫാസിലും നസ്രിയയും ആണ് ഇപ്പോൾ സോഷ്യൽ മീഡിയയിൽ തിളങ്ങി നിൽക്കുന്നത്. ഇരുവരും ഒന്നിച്ചു അഭിനയിച്ച അൻവർ റഷീദ് ചിത്രം ട്രാൻസ് റിലീസിന് ഒരുങ്ങുമ്പോൾ സോഷ്യൽ മീഡിയയിൽ വൈറലാവുന്നത് ഒരു സുഹൃത്തിന്റെ കല്യാണത്തിന് ഡാൻസും പാട്ടുമൊക്കെയായി തിളങ്ങുന്ന ഈ താരങ്ങളുടെ പുതിയ വീഡിയോകളാണ്. രോഹിത് ഷെട്ടി സംവിധാനം ചെയ്ത സിംബാ എന്ന ചിത്രത്തിൽ രൻവീർ സിങ്, സാറാ അലി ഖാൻ എന്നിവർ ചുവടു വെക്കുന്ന റീമിക്‌സ് സോങ് ആയ ആംഖ് മാരെ എന്ന ഗാനത്തിന് നൃത്തം ചെയ്യുന്ന ഫഹദ്, നസ്രിയ എന്നിവരുടെ വീഡിയോ ആണ് ശ്രദ്ധ നേടുന്നത്.

ഈ അടുത്തിടെയായി ഇരുവരും ഒരുമിച്ചുള്ള ഒരുപാട് സ്റ്റില്ലുകൾ സോഷ്യൽ മീഡിയയിൽ ശ്രദ്ധ നേടുന്നുണ്ട്. രണ്ടു വർഷം മുൻപ് റീലീസ് ചെയ്ത കൂടെ എന്ന അഞ്ജലി മേനോൻ- പൃഥ്വിരാജ് ചിത്രത്തിലൂടെ കല്യാണത്തിന് ശേഷം അഭിനയത്തിൽ നിന്നിടവേളയെടുത്തു മാറി നിന്നിരുന്ന നസ്രിയ തിരിച്ചു വന്നിരുന്നു. അതിനു ശേഷം നസ്രിയ അഭിനയിച്ച ചിത്രമാണ് ട്രാൻസ്. ഈ മാസം റിലീസ് പ്രതീക്ഷിക്കുന്ന ട്രാൻസ് രചിച്ചത് വിൻസെന്റ് വടക്കനും നിർമ്മിച്ചത് സംവിധായകൻ അൻവർ റഷീദുമാണ്. അമൽ നീരദ് ഛായാഗ്രഹണം നിർവ്വഹിച്ച ഈ ചിത്രം ഇപ്പോൾ ചില സെൻസർ പ്രശ്നങ്ങൾ നേരിടുകയാണ് എന്ന റിപ്പോർട്ടുകളാണ് വരുന്നത്. ഗൗതം വാസുദേവ് മേനോൻ, സൗബിൻ ഷാഹിർ, വിനായകൻ, ചെമ്പൻ വിനോദ്, ദിലീഷ് പോത്തൻ, ശ്രീനാഥ് ഭാസി, ജിനു ജോസഫ് തുടങ്ങി ഒരു വലിയ താര നിര ഈ ചിത്രത്തിൽ അണിനിരക്കുന്നുണ്ട്.

ഫോട്ടോ കടപ്പാട്: Nazriya Fahadh(Instagram)