നാനിയുടെ നൃത്തച്ചുവടുകളുമായി ദസറയിലെ ധൂം ധാം ദോസ്താൻ ഗാനമെത്തി; വീഡിയോ കാണാം

തെലുങ്ക് യുവ താരം നാനി നായകനായി എത്തുന്ന പാൻ ഇന്ത്യൻ ആക്ഷൻ ചിത്രമായ ദസറയിലെ ആദ്യ ഗാനം ഇന്ന് റിലീസ് ചെയ്തു. നാനിയുടെ കിടിലൻ നൃത്തവുമായി എത്തിയിരിക്കുന്ന ഈ അടിപൊളി ഗാനം രചിച്ചത് കസർലാ ശ്യാം, ആലപിച്ചത് രാഹുൽ സിപ്ളിഗുഞ്ച, ഗോട്ടെ കണ്കവ്വാ, ഗെന്നോരാ ദശ ലക്ഷ്മി, പലമുരു ജംഗിറെഡ്ഢി, നര്സന്ന, കസർലാ ശ്യാം എന്നിവർ ചേർന്നാണ്. സന്തോഷ് നാരായണനാണ് ഈ ഗാനത്തിന് സംഗീതമൊരുക്കിയത്. ഗോദാവരി കനിയിലെ സിങ്കേരണി കൽക്കരി ഖനിയിൽ സ്ഥിതി ചെയ്യുന്ന ഒരു ഗ്രാമത്തിൽ നടക്കുന്ന കഥ പറയുന്ന ഈ ചിത്രത്തിലെ ആദ്യ ഗാനത്തിന്റെ ലിറിക്കൽ വിഡിയോയാണ്‌ ഇപ്പോൾ റിലീസ് ചെയ്തിരിക്കുന്നത്. കീർത്തി സുരേഷ് നായികാ വേഷം ചെയ്യുന്ന ഈ ചിത്രം നവാഗതനായ ശ്രീകാന്ത് ഒഡേലയാണ് സംവിധാനം ചെയ്തിരിക്കുന്നത്. നായകന്റെ കൽക്കരി ഖനികളിലെ സുഹൃത്തുക്കൾക്കൊപ്പമുള്ള ഒരു ലോക്കൽ സ്ട്രീറ്റ് സോങ് ആയാണ് ഈ ഗാനം ഒരുക്കിയിരിക്കുന്നതെന്ന് ഇതിന്റെ ദൃശ്യങ്ങൾ സൂചിപ്പിക്കുന്നു.

പുഷ്പ എന്ന ചിത്രത്തിലെ അല്ലു അർജുനെ അനുസ്മരിപ്പിക്കുന്ന ലുക്കിലാണ് നാനി ഇതിൽ പ്രത്യക്ഷപ്പെടുന്നത്. തെലുങ്ക്, തമിഴ്, മലയാളം, കന്നഡ, ഹിന്ദി ഭാഷകളിൽ 2023 മാർച്ച് 30നാണ് ഈ ചിത്രം റിലീസ് ചെയ്യാൻ പോകുന്നത്. നേരത്തെ ചിത്രത്തിന്റെ റിലീസ് തീയതി പുറത്തു വിട്ടു കൊണ്ട് പങ്ക് വെച്ച ഒഫീഷ്യൽ പോസ്റ്റർ സോഷ്യൽ മീഡിയയിൽ വൈറലായി മാറിയിരുന്നു. ഈ ചിത്രത്തിന് ക്യാമറ ചലിപ്പിക്കുന്നത് സത്യൻ സൂര്യൻ, എഡിറ്റ് ചെയ്യുന്നത് നവീൻ നൂലി എന്നിവരാണ്. സമുദ്രക്കനി, സായ് കുമാർ, സറീന വഹാബ് എന്നിവരും വേഷമിടുന്ന ഈ ചിത്രം രചിച്ചതും സംവിധായകൻ തന്നെയാണ്. ശ്രീ ലക്ഷ്മി വെങ്കിടേശ്വര സിനിമാസിന്റെ ബാനറിൽ സുധാകർ ചെറുകുരിയാണ് ദസറ നിർമ്മിക്കുന്നത്.