നായകൻ മാത്രമല്ല ഗായകനുമായി ജോജു ജോർജ്; അദൃശ്യത്തിലെ ആദ്യ ഗാനം കാണാം..!

ഏതാനും ദിവസങ്ങൾക്കു മുൻപാണ് നവാഗതനായ സാക് ഹാരിസ് ഒരുക്കിയ അദൃശ്യം എന്ന ഇൻവെസ്റ്റിഗേഷൻ ത്രില്ലർ ചിത്രത്തിന്റെ ടീസർ പുറത്തു വന്നത്. മലയാളം, തമിഴ് ഭാഷകളില്‍ ഒരേസമയം ഒരുക്കിയ ചിത്രമാണ് അദൃശ്യം. ജോജു ജോര്‍ജ്, നരേന്‍, ഷറഫുദ്ദീന്‍ എന്നിവര്‍ മലയാളത്തില്‍ പ്രധാന വേഷത്തില്‍ എത്തുമ്പോൾ, തമിഴിൽ പ്രധാന വേഷങ്ങൾ ചെയ്തിരിക്കുന്നത് പരിയേറും പെരുമാള്‍ ഫെയിം കതിര്‍, നരേയ്ന്‍, നട്ടി നടരാജന്‍ എന്നിവരാണ്. കായൽ ആനന്ദി, പവിത്ര ലക്ഷ്മി, ആത്മീയ രാജന്‍, പ്രതാപ് പോത്തന്‍, ജോണ്‍ വിജയ്, മുനിഷ്‌കാന്ത്, സിനില്‍ സൈന്‍യുദീന്‍, വിനോദിനി, അഞ്ജലി റാവു, ബിന്ദു സഞ്ജീവ എന്നിവരും അഭിനയിച്ച ഈ ചിത്രത്തിന്റെ ട്രെയിലറിന് ഗംഭീര പ്രതികരണമാണ് ലഭിച്ചത്. പാക്ക്യരാജ് രാമലിംഗം തിരക്കഥ ഒരുക്കിയ ഈ ചിത്രത്തിന് ഛായാഗ്രഹണം നിര്‍വഹിച്ചിരിക്കുന്നത് പുഷ്പരാജ് സന്തോഷ്, ഗാനങ്ങൾ ഒരുക്കിയത് രെഞ്ജിൻ രാജ്, പശ്ചാത്തല സംഗീതം ഒരുക്കിയത് ഡോൺ വിൻസെന്റ് എന്നിവരാണ്.

ഇപ്പോഴിതാ ഈ ചിത്രത്തിലെ ഒരു ഗാനം പുറത്തു വന്നിരിക്കുകയാണ്. നായകനായ ജോജു ജോർജ് ആലപിച്ച അയ്യപ്പ ഭക്തി ഗാനമാണ് റിലീസ് ചെയ്തിരിക്കുന്നത്. ചന്ദ്രകലാധരനെ എന്ന് തുടങ്ങുന്ന ഈ ഗാനം രചിച്ചത് ബി കെ ഹരിനാരായണൻ ആണ്. പരമ്പരാഗതമായ ചിന്തുപാട്ടിന്റെ രീതിയിലാണ് ഈ ഗാനം ഒരുക്കിയിരിക്കുന്നത്. ഇതിന്റെ ലിറിക് വീഡിയോ ആണ് ഇപ്പോൾ പുറത്തു വന്നിരിക്കുന്നത്. ഫോറന്‍സിക്, കള എന്നീ സൂപ്പര്‍ ഹിറ്റ് ചിത്രങ്ങളുടെ ബാനര്‍ ആയ ജുവിസ് പ്രൊഡക്ഷനും യു.എ.എന്‍ ഫിലിം ഹൗസ്, എ.എ.എ. ആര്‍ പ്രൊഡക്ഷന്‍സ് എന്നിവരും ചേർന്നാണ് ഈ ബിഗ് ബജറ്റ് ചിത്രം നിർമ്മിച്ചിരിക്കുന്നത്. ആശിഷ് ജോസെഫ് എഡിറ്റ് ചെയ്തിരിക്കുന്ന ഈ ചിത്രത്തിന്റെ തമിഴിലെ പേര് യുക്കി എന്നാണ്.