കലാഭവൻ മണിയുടെ ചാലക്കുടി ചന്തക്കു പോകുമ്പോൾ എന്ന ഗാനവുമായി ചാലക്കുടിക്കാരൻ ചങ്ങാതി..!

അന്തരിച്ചു പോയ കലാഭവൻ മണി എന്ന മലയാളികളുടെ പ്രീയപ്പെട്ട മണി ചേട്ടന്റെ ജീവിത കഥയെ ആസ്പദമാക്കി വിനയൻ സംവിധാനം ചെയ്ത ചിത്രമാണ് ചാലക്കുടിക്കാരൻ ചങ്ങാതി. ഇപ്പോൾ പോസ്റ്റ്-പ്രൊഡക്ഷൻ സ്റ്റേജിൽ ഉള്ള ഈ ചിത്രം അടുത്ത മാസം അവസാനത്തോടെ റിലീസ് ചെയ്യുമെന്നാണ് സൂചന. ഏതായാലും ഇപ്പോൾ ഈ ചിത്രത്തിലെ പുതിയ സോങ് വീഡിയോ റിലീസ് ചെയ്തു കഴിഞ്ഞു. കലാഭവൻ മണിയുടെ സൂപ്പർ ഹിറ്റ് നാടൻ പാട്ടായ ചാലക്കുടി ചന്തക്കു പോകുമ്പോൾ ചന്ദന ചോപ്പുള്ള മീങ്കാരി പെണ്ണിനെ കണ്ടേ ഞാൻ എന്ന ഗാനമാണ് ഈ ചിത്രത്തിന് വേണ്ടി വിനയൻ ചിത്രീകരിച്ചിരിക്കുന്നത്. കലാഭവൻ മണിയുടെ സഹോദരനായ ആർ എൽ വി രാമകൃഷ്ണൻ ആലപിച്ചിരിക്കുന്നു ഈ ഗാനത്തിന് സംഗീതം പകർന്നത് അറുമുഖൻ വെങ്കിടങ് ആണ്. അദ്ദേഹത്തിന്റെ തന്നെയാണ് ഈ ഗാനത്തിന്റെ വരികളും. ഈ ചിത്രത്തിന് വേണ്ടി ഈ ഗാനം റീമിക്സ് ചെയ്തിരിക്കുന്നത് റാം സുരേന്ദ്രൻ ആണ്.

ആൽഫാ ഫില്മിസിന്റെ ബാനറിൽ ഗ്‌ളാസ്റ്റൺ നിർമ്മിച്ചിരിക്കുന്ന ഈ ചിത്രത്തിൽ മിനി സ്‌ക്രീനിലൂടെ പ്രേക്ഷകർക്ക് സുപരിചതനായ രാജാമണിയാണ് കലാഭവൻ മണിയുടെ കഥാപാത്രത്തെ അവതരിപ്പിക്കുന്നത്. ധർമജൻ ബോൾഗാട്ടി, രമേശ് പിഷാരടി , ഹണി റോസ്, സലിം കുമാർ, കോട്ടയം പ്രദീപ്, ബിജു കുട്ടൻ, എന്നിവരും ഈ ചിത്രത്തിൽ പ്രധാന കഥാപാത്രങ്ങളെ അവതരിപ്പിച്ചിരിക്കുന്നു. ഉമ്മർ മുഹമ്മദ് തിരക്കഥ ഒരുക്കിയ ഈ ചിത്രത്തിന് ദൃശ്യങ്ങൾ നൽകിയിരിക്കുന്നത് പ്രകാശ് കുട്ടിയും എഡിറ്റ് ചെയ്തിരിക്കുന്നത് അഭിലാഷ് വിശ്വനാഥും ആണ്. വാസന്തിയും ലക്ഷ്മിയും പിന്നെ ഞാനും , കരുമാടിക്കുട്ടൻ തുടങ്ങിയ മികച്ച ചിത്രങ്ങൾ മണിയെ നായകനാക്കി സംവിധാനം ചെയ്തിട്ടുള്ള വിനയൻ കലാഭവൻ മണിയുമായി അടുത്ത ബന്ധം പുലർത്തിയിരുന്ന ആളാണ്. ഈ ചിത്രത്തിലെ മറ്റൊരു സോങ് വീഡിയോ കുറച്ചു നാൾ മുൻപ് റിലീസ് ചെയ്യുകയും, മികച്ച ജനശ്രദ്ധ നേടിയെടുക്കുകയും ചെയ്തിരുന്നു.