ബോസ് പാർട്ടി ഗാനവുമായി ബോസ് എത്തി; ചിരഞ്ജീവിയുടെ വാൾട്ടയർ വീരയ്യയിലെ ആദ്യ ഗാനം കാണാം

തെന്നിന്ത്യൻ മെഗാ സ്റ്റാറായ ചിരഞ്ജീവി നായകനായി എത്തുന്ന ഏറ്റവും പുതിയ ചിത്രമാണ് വാൾട്ടയർ വീരയ്യ. കുറച്ചു നാൾ മുൻപ് ഇതിന്റെ ടൈറ്റിൽ ടീസർ റിലീസ് ചെയ്യുകയും അത് സോഷ്യൽ മീഡിയയിൽ സൂപ്പർ ഹിറ്റായി മാറുകയും ചെയ്തിരുന്നു. ചിരഞ്ജീവിയുടെ 154 ആം ചിത്രമായി എത്തുന്ന ഇതിൽ കിടിലൻ ലുക്കിലാണ് അദ്ദേഹം പ്രത്യക്ഷപ്പെട്ടത്. ബോബി സംവിധാനം ചെയ്ത വാൾട്ടയർ വീരയ്യ ഒരു ലോക്കൽ മാസ്സ് മസാല ചിത്രമാകും എന്ന സൂചനയാണ്‌ ഇതിന്റെ ടൈറ്റിൽ ടീസർ നമ്മുക്ക് സമ്മാനിച്ചത്. ഇപ്പോഴിതാ ഇതിന്റെ ആദ്യ ഗാനം കൂടി റിലീസ് ചെയ്തിരിക്കുകയാണ്. റോക്ക്സ്റ്റാർ ദേവി ശ്രീ പ്രസാദ് രചിക്കുകയും ആലപിക്കുകയും ചെയ്ത ബോസ് പാർട്ടി എന്ന ഈ ഗാനത്തിന് ഈണം പകർന്നതും അദ്ദേഹം തന്നെയാണ്. അദ്ദേഹത്തിനൊപ്പം നകാശ് അസീസ്, ഹരിപ്രിയ എന്നിവരും കൂടി ചേർന്നാണ് ഈ ഗാനം ആലപിച്ചിരിക്കുന്നത്.

മെഗാസ്റ്റാർ ചിരഞ്ജീവി, ഉർവശി റൗട്ടേല എന്നിവരുടെ കിടിലൻ നൃത്തമാണ് ഈ ഗാനത്തിന്റെ ഹൈലൈറ്റ്. ഉർവശിയുടെ ഗ്ലാമർ പ്രദർശനവും ആരാധകരെ ആകർഷിക്കുന്നുണ്ട്. ആക്ഷനും കോമെഡിക്കും പ്രാധാന്യം നല്കിയൊരുക്കിയ ഈ ചിത്രം നിർമ്മിച്ചിരിക്കുന്നത് റാം ചരൺ നായകനായ രംഗസ്ഥലം, അല്ലു അർജുന്റെ പുഷ്പ പോലത്തെ ബ്ലോക്ക്ബസ്റ്റർ ചിത്രങ്ങളൊരുക്കിയ മൈത്രി മൂവി മേക്കേഴ്‌സാണ്. 2023 സംക്രാന്തിക്ക് ഈ ചിത്രം പ്രദർശനത്തിനെത്തുമെന്നാണ് ഇപ്പോൾ പുറത്തു വിട്ടിരിക്കുന്ന വിവരങ്ങൾ പറയുന്നത്. തെലുങ്ക് സൂപ്പര്‍ സ്റ്റാര്‍ രവി തേജയും പ്രധാന വേഷത്തില്‍ എത്തുന്ന ഈ ചിത്രത്തിൽ ശ്രുതി ഹാസനാണ് നായികാ വേഷത്തിൽ എത്തുന്നത്. കാതറീൻ ട്രീസയും അഭിനയിക്കുന്ന ഈ ചിത്രത്തിന് ക്യാമറ ചലിപ്പിച്ചത് ആർതർ എ വിൽ‌സൺ, എഡിറ്റ് ചെയ്തിരിക്കുന്നത് നിരഞ്ജൻ ദേവരമനേ എന്നിവരാണ്.