ദീപികയുടെ ഗ്ലാമറും ഷാരൂഖ് ഖാന്റെ സ്‌റ്റൈലുമായി പത്താനിലെ ബേഷരം രംഗ്; വീഡിയോ ഗാനം കാണാം

ബോളിവുഡ് കിംഗ് ഖാൻ ഷാരൂഖ് ഖാൻ നായകനായി എത്തുന്ന ഏറ്റവും പുതിയ ചിത്രമാണ് പത്താൻ. അടുത്ത വർഷം ജനുവരി ഇരുപത്തിയഞ്ചിന് റിലീസ് ചെയ്യാൻ പോകുന്ന ഈ സ്പൈ ആക്ഷൻ ത്രില്ലർ ചിത്രത്തിന്റെ ഒരു ടീസർ ഇതിനോടകം സൂപ്പർ ഹിറ്റായി മാറിയിട്ടുണ്ട്. ഇപ്പോഴിതാ ഈ ചിത്രത്തിലെ ആദ്യ ഗാനത്തിന്റെ വീഡിയോ കൂടി റിലീസ് ചെയ്തിട്ടുണ്ട്. ബേഷരം രംഗ് എന്ന വരികളോടെ തുടങ്ങുന്ന ഈ ഗാനം രചിച്ചത് കുമാറും, ഈ ഗാനത്തിന് ഈണം പകർന്നത് വിശാൽ- ശേഖർ ടീമുമാണ്. ശില്പ റാവു, ക്യാറലിസ മൊണ്ടെയ്‌റോ, വിശാൽ, ശേഖർ എന്നിവർ ചേർന്നാണ് ഈ ഗാനം ആലപിച്ചിരിക്കുന്നത്. നായികയായ ദീപിക പദുക്കോണിന്റെ അസാമാന്യമായ ഗ്ലാമർ പ്രദർശനവും സ്റ്റൈലിഷ് ലുക്കിലെത്തുന്ന ഷാരൂഖ് ഖാനുമാണ് ഈ ഗാനത്തിന്റെ ഹൈലൈറ്റ് എന്ന് പറയാം. ഓം ശാന്തി ഓം, ബില്ലു ബാർബർ, ചെന്നൈ എക്സ്പ്രസ്, ഹാപ്പി ന്യൂ ഇയർ, സീറോ, എന്നിവക്ക് ശേഷം ഷാരൂഖ് ഖാൻ- ദീപിക ടീം ഒരുമിച്ചഭിനയിച്ച ചിത്രമാണ് പത്താൻ.

വാർ എന്ന സൂപ്പർ മെഗാഹിറ്റ് ഹൃത്വിക് റോഷൻ- ടൈഗർ ഷെറോഫ് ചിത്രത്തിന് ശേഷം സിദ്ധാർഥ് ആനന്ദ് ഒരുക്കിയ പത്താൻ നിർമ്മിച്ചിരിക്കുന്നത് യാഷ് രാജ് ഫിലിംസ് ആണ്. അവരുടെ 50 ആം ചിത്രമാണ് പത്താൻ. സൂപ്പർ താരം ജോൺ അബ്രഹാം വില്ലൻ വേഷം ചെയ്തിരിക്കുന്ന പത്താനിൽ, തന്റെ സൂപ്പർഹിറ്റ് സ്പൈ കഥാപാത്രമായ ടൈഗർ ആയി മെഗാസ്റ്റാർ സൽമാൻ ഖാൻ അതിഥി വേഷത്തിലും അഭിനയിച്ചിട്ടുണ്ട്. ഹിന്ദി കൂടാതെ, തമിഴ്, തെലുങ്ക് ഭാഷകളിലും കൂടെ ചേർന്ന് പാൻ ഇന്ത്യൻ ചിത്രമായി റിലീസ് ചെയ്യാൻ പോകുന്ന ഈ ചിത്രത്തിന്റെ ട്രൈലെർ വൈകാതെ റിലീസ് ചെയ്യുമെന്നാണ് സൂചന.