ആസിഫ് അലി- സണ്ണി വെയ്ൻ ചിത്രമായ കുറ്റവും ശിക്ഷയിലെ ഗാനം കാണാം..!

യുവ താരങ്ങളായ ആസിഫ് അലി, സണ്ണി വെയ്ൻ എന്നിവരെ കേന്ദ്ര കഥാപാത്രങ്ങളാക്കി പ്രശസ്ത സംവിധായകൻ രാജീവ് രവിയൊരുക്കിയ കുറ്റവും ശിക്ഷയും ഈ വരുന്ന മെയ് ഇരുപത്തിയേഴിനാണ്‌ റിലീസ് ചെയ്യുന്നത്. കമ്മട്ടിപ്പാടത്തിന് ശേഷം രാജീവ് രവിയൊരുക്കിയ ഈ ചിത്രത്തിന്റെ ട്രൈലെർ സോഷ്യൽ മീഡിയയിൽ വമ്പൻ ഹിറ്റായി മാറിയിരുന്നു. ഇപ്പോഴിതാ ഈ ചിത്രത്തിലെ ഒരു ഗാനം റിലീസ് ചെയ്തിരിക്കുകയാണ്. അരികെ വരാതെ എന്ന വരികളോടെ തുടങ്ങുന്ന ഈ ഗാനം രചിച്ചിരിക്കുന്നത് അൻവർ അലിയും ഈ ഗാനമാലപിച്ചിരിക്കുന്നതു നേഹ നായർ, ഡോൺ വിൻസെന്റ് എന്നിവർ ചേർന്നുമാണ്. ഡോൺ വിൻസെന്റ് തന്നെയാണ് ഈ ഗാനത്തിന് ഈണം പകർന്നിരിക്കുന്നതും. ഒരു ലിറിക് വീഡിയോയായാണ് ഈ പ്രോമോ സോങ് പുറത്ത് വിട്ടിരിക്കുന്നത്.

ഒരു ഇൻവെസ്റ്റിഗേഷൻ ത്രില്ലറായി ഒരുക്കിയ ഈ ചിത്രം, തൊണ്ടിമുതലും ദൃക്സാക്ഷിയും എന്ന ചിത്രത്തിലൂടെ പ്രശസ്തനായ നടനും പൊലീസ് ഉദ്യോഗസ്ഥനുമായ സിബി തോമസും മാധ്യമപ്രവര്‍ത്തകനും തിരക്കഥാകൃത്തുമായ ശ്രീജിത്ത് ദിവാകരനും ചേർന്നാണ് രചിച്ചത്. അഞ്ച് പൊലീസ് ഉദ്യോഗസ്ഥര്‍ ഒരു ജ്വല്ലറി മോഷണത്തെ തുടര്‍ന്ന്, കേസ് അന്വേഷണത്തിനായി വടക്കേ ഇന്ത്യയിലേക്ക് നടത്തിയ യാത്രയാണ് ഈ സിനിമക്കാധാരം. കാസർകോഡ് നടന്ന യഥാർഥ സംഭവത്തെ ആസ്പദമാക്കിയാണ് കുറ്റവും ശിക്ഷയും ഒരുക്കിയത്. ഷറഫുദീൻ, അലൻസിയർ ലോപ്പസ്, സെന്തിൽ കൃഷ്ണ, ശ്രിന്ദ തുടങ്ങിയവരാണ് ചിത്രത്തിലെ മറ്റ് പ്രധാന താരങ്ങൾ. ഫിലിം റോള്‍ പ്രൊഡക്ഷന്‍സിന്റെ ബാനറില്‍ അരുണ്‍കുമാര്‍ വി ആർ നിർമ്മിച്ച ഈ ചിത്രത്തിന്, ബി.അജിത്കുമാർ എഡിറ്റിങ്ങും, സുരേഷ് രാജൻ ക്യാമറയും കൈകാര്യം ചെയ്തിരിക്കുന്നു. രാജസ്ഥാനിലെ ജയ്പൂരായിരുന്നു ഈ ചിത്രത്തിന്റെ പ്രധാന ലൊക്കേഷൻ.