വീണ്ടും വിസ്മയിപ്പിച്ച് ഷാൻ റഹ്മാൻ; അരവിന്ദന്റെ അതിഥികളിലെ പുത്തൻ ഗാനം ഇതാ..

വിനീത് ശ്രീനിവാസനും ശ്രീനിവാസനും വർഷങ്ങൾ,ക്ക് ശേഷം ഒന്നിച്ച ചിത്രം അരവിന്ദന്റെ അതിഥികളിലെ മികച്ച ഒരു ഗാനം കൂടി പുറത്തു വന്നു. ആനന്ദമേ എന്നു തുടങ്ങുന്ന അതിമനോഹരമായ മെലഡിയാണ് പുറത്തു വന്നിരിക്കുന്നത്. ആനി ആമിയാണ് ഈ മനോഹര ഗാനം ആലപിച്ചിരിക്കുന്നത്. ഹരിനാരായണൻ ഗാനം രചിച്ചിരിക്കുന്നു. ചിത്രത്തിലേതായി പുറത്തിറങ്ങിയ ആദ്യ ഗാനം ആലപിച്ചത് വിനീത് ശ്രീനിവാസൻ ആയിരുന്നു. ഷാൻ റഹ്‌മാനും വിനീത് ശ്രീനിവാസനും കൂട്ടുകെട്ട് വീണ്ടും മികച്ചതാക്കി മാറ്റി. ഗാനങ്ങൾക്ക് ഏറെ പ്രാധാന്യം നൽകി തന്നെയാണ് ചിത്രം ഒരുക്കിയിരിക്കുന്നത്. ആറോളം ഗാനങ്ങൾ ചിത്രത്തിൽ ഉണ്ട്.

നിരവധി കാലം സത്യൻ അന്തിക്കാടിന്റെ സഹായി ആയിരുന്ന എം. മോഹനൻ ശ്രീനിവാസൻ തിരക്കഥ രചിച്ചു അഭിനയിച്ച കഥപറയുമ്പോൾ എന്ന ചിത്രത്തിലൂടെയാണ് സംവിധാന രംഗത്തേക്ക് കടന്നു വന്നത്. ചിത്രം ആ വർഷത്തെ ഏറ്റവും വലിയ ഹിറ്റുകളിൽ ഒന്നായി മാറി. അതിനുശേഷം എം. മോഹനും ശ്രീനിവാസനും വീണ്ടും ഒന്നിക്കുന്ന ചിത്രമാണ് അരവിന്ദന്റെ അതിഥികൾ. അതിനാൽ തന്നെ ചിത്രത്തിന്റെ പ്രതീക്ഷയും വാനോളമാണ്. ചിത്രത്തിൽ നായക കഥാപാത്രമായ മാധവനായി ശ്രീനിവാസൻ എത്തുന്നു തുല്യപ്രാധാന്യത്തോടെ മകൻ വിനീത് ശ്രീനിവാസൻ അരവിന്ദൻ എന്ന കഥാപാത്രമായും എത്തുന്നു. നിഖില വിമൽ ആണ് ചിത്രത്തിലെ നായിക ആയി എത്തുന്നത് അജു വർഗീസ്, ശാന്തി കൃഷ്ണ, ഉർവശി തുടങ്ങിയവർ ചിത്രത്തിൽ മറ്റ് കഥാപാത്രങ്ങളായി എത്തുന്നു. ചിത്രം ഏപ്രിൽ 27 നു തീയറ്ററുകളിൽ എത്തും.