തീയേറ്റർ പൂരപ്പറമ്പാക്കിയ ദളപതി വിജയ്‌യുടെ അറബിക് കുത്ത് വീഡിയോ ഗാനമെത്തി..!

ദളപതി വിജയ് നായകനായെത്തിയ ഏറ്റവും പുതിയ ചിത്രമാണ് ബീസ്റ്റ്. നെൽസൺ ദിലീപ്കുമാർ രചിച്ചു സംവിധാനം ചെയ്ത ഈ ചിത്രം, ഏപ്രിൽ പതിമൂന്നിനാണ് ആഗോള റിലീസായെത്തിയത്. പ്രേക്ഷകരിൽ നിന്ന് സമ്മിശ്ര പ്രതികരണവും നിരൂപകരിൽ നിന്ന് വിമർശനവുമാണ് നേടിയതെങ്കിലും ബോക്‌സ് ഓഫീസിൽ നിന്ന് 250 കോടിയോളം രൂപയാണ് ഈ വിജയ് ചിത്രം നേടിയത്. ഇപ്പോഴിതാ മെയ് പതിനൊന്ന് മുതൽ ഒറ്റിറ്റി പ്ലാറ്റ്‌ഫോമുകളായ നെറ്റ് ഫ്ലിക്‌സ്, സണ് നെക്സ്റ്റ് എന്നിവയിലും ഈ ചിത്രം സ്ട്രീം ചെയ്ത് തുടങ്ങും. അതിനു മുൻപായി ഇതിലെ മെഗാ ഹിറ്റായ അറബിക് കുത്തു ഗാനത്തിന്റെ ഫുൾ വീഡിയോ റിലീസ് ചെയ്തിരിക്കുകയാണ്. ദളപതി വിജയ്, നായിക പൂജ ഹെഗ്‌ഡെ എന്നിവരുടെ കിടിലൻ നൃത്ത ചുവടുകളാണ് ഈ ഗാനത്തിന്റെ ഹൈലൈറ്റ്. നേരത്തെ റിലീസ് ചെയ്ത ഇതിന്റെ ലിറിക്കൽ വീഡിയോ യൂട്യൂബിൽ റെക്കോർഡുകൾ തകർത്താണ് മുന്നേറിയത്.

അറബിക് സ്റ്റൈൽ മ്യൂസിക്, വരികൾ എന്നിവക്കൊപ്പം തമിഴ് ബീറ്റുകൾ മിക്സ് ചെയ്ത്, പാൻ വേൾഡ് സോങ് എന്ന് രസകരമായി പറഞ്ഞുകൊണ്ടാണ് ഈ ഗാനം റിലീസ് ചെയ്തത്. തമിഴിലെ യുവ സൂപ്പർ താരം ശിവകാർത്തികേയൻ വരികൾ രചിച്ചിരിക്കുന്ന ഈ ഗാനത്തിന് സംഗീതം പകർന്നിരിക്കുന്നത് അനിരുദ്ധ് രവിചന്ദരാണ്. അനിരുദ്ധ് രവിചന്ദർ, ജോണിത ഗാന്ധി എന്നിവർ ചേർന്നാണ് ഈ ഗാനം പാടിയിരിക്കുന്നത്. സൺ പിക്ചേഴ്സ് നിർമ്മിച്ച ഈ ബിഗ് ബഡ്ജറ്റ് ചിത്രത്തിൽ സെൽവ രാഘവൻ, യോഗി ബാബു, ഷൈൻ ടോം ചാക്കോ, വിടിവി ഗണേഷ്, അപർണ്ണ ദാസ്, പുകഴ് എന്നിവരുമഭിനയിച്ചിട്ടുണ്ട്. മനോജ് പരമഹംസ ക്യാമറ ചലിപ്പിച്ച ഈ ചിത്രം എഡിറ്റ് ചെയ്തിരിക്കുന്നത് ആർ നിർമ്മലാണ്.