സൺ‌ഡേ ഹോളിഡേയിലെ ആ മനോഹര ഗാനമാലപിച്ചു അപർണ ബാലമുരളി; വീഡിയോ വൈറലാവുന്നു..!

മൂന്ന് വർഷം മുൻപ് ഒരു ജൂലൈ പതിനാലിന് റിലീസ് ചെയ്ത ആസിഫ് അലി ചിത്രമാണ് സൺ‌ഡേ ഹോളിഡേ. വലിയ ബഹളങ്ങൾ ഒന്നുമില്ലാതെ റിലീസ് ചെയ്ത ഈ ചിത്രം ഏവരെയും ഞെട്ടിച്ചു കൊണ്ട് തീയേറ്ററുകളിൽ നൂറു ദിവസം പിന്നിട്ടു കൊണ്ട് ആ വർഷത്തെ സൂപ്പർ ഹിറ്റുകളിൽ ഒന്നായി മാറി. മാക്ട്രോ പിക്ചേഴ്സ് നിർമ്മിച്ച ആ ചിത്രം രചിച്ചു സംവിധാനം ചെയ്തത് ജിസ് ജോയ് ആണ്. ആസിഫ് അലിക്കൊപ്പം അപർണ്ണ ബാലമുരളി, സിദ്ദിഖ്, ശ്രീനിവാസൻ, ലാൽ ജോസ്, ശ്രുതി രാമചന്ദ്രൻ, ഭഗത് മാനുവൽ, ആശ ശരത്, അലെൻസിയർ, സുധീർ കരമന, കെ പി എ സി ലളിത എന്നിവർ അഭിനയിച്ച ഈ ചിത്രം ആസിഫ് അലി എന്ന നടൻെറയും താരത്തിന്റെയും കരിയറിലെ നിർണ്ണായക ചിത്രങ്ങളിലൊന്നായ മാറി. ഇതിലെ ഗാനങ്ങൾ എല്ലാം തന്നെ സൂപ്പർ ഹിറ്റായതും ചിത്രത്തിന് മുതൽ കൂട്ടായിരുന്നു. ദീപക് ദേവാണ് ഈ ചിത്രത്തിന് വേണ്ടി സംഗീത സംവിധാനം നിർവഹിച്ചത്. ഇപ്പോഴിതാ, ഈ ചിത്രം റിലീസ് ചെയ്തു മൂന്നു വർഷം കഴിയുമ്പോൾ, ഇതിലെ നായികയായ അപർണ്ണ ബാലമുരളി ഈ ചിത്രത്തിലെ ഒരു സൂപ്പർ ഹിറ്റ് ഗാനം അതിമനോഹരമായി ആലപിക്കുന്ന വീഡിയോ ആണ് വൈറൽ ആവുന്നത്.

ഒരു നോക്ക് കാണുവാൻ കാത്തിരുന്നവൾ എന്ന വരികളോടെ തുടങ്ങുന്ന ഇതിലെ ഗാനമാണ് അപർണ്ണ ബാലമുരളി ആലപിക്കുന്നത്. ചിത്രത്തിൽ കാർത്തിക് ആണ് ഈ ഗാനമാലപിച്ചതു. തന്റെ ഇൻസ്റാഗ്രാമിലൂടെ വീഡിയോ പങ്കു വെച്ച അപർണ്ണ ബാലമുരളി ഈ ചിത്രം തന്റെ കരിയറിൽ എത്രത്തോളം സ്വാധീനമുണ്ടാക്കി എന്നും കുറിക്കുന്നു. ചിത്രത്തിൽ ഒപ്പം പ്രവർത്തിച്ച എല്ലാവർക്കും നന്ദി പറയാനും അപർണ്ണ ആ അവസരം ഉപയോഗിച്ചു. ഏതായാലും സംഗീതം പഠിച്ചിട്ടുള്ള അപർണ്ണ ബാലമുരളി, മനോഹരമായി തന്നെയാണ് ഈ ഗാനം ആലപിച്ചിരിക്കുന്നത്. സിനിമാ രംഗത്ത് നിന്നുള്ള ഒരുപാട് സുഹൃത്തുക്കൾ ഇൻസ്റാഗ്രാമിലൂടെ അപർണ്ണക്കു പ്രശംസയുമായി എത്തിയിട്ടുണ്ട്.