എല്ലാ കളികളും കഴിയുമ്പോ ആ നടുവിരൽ; വരാലിന്റെ ട്രെയിലർ ശ്രദ്ധ നേടുന്നു

വിധി എന്ന ചിത്രത്തിന് ശേഷം അനുപ് മേനോനെ കേന്ദ്ര കഥാപാത്രമാക്കി കണ്ണൻ താമരക്കുളം സംവിധാനം ചെയ്യുന്ന പുതിയ ചിത്രമാണ് വരാൽ. ചിത്രത്തിന്റെതായി പുറത്തിറങ്ങിയ ട്രെയിലർ ചടുലമായ സംഭാഷണങ്ങൾ കോണ്ട് സമൂഹ മാധ്യമങ്ങളിൽ ശ്രദ്ധ നേടുകയാണ്. പൃഥ്വിരാജ്, ടോവിനോ തോമസ്, ജയസൂര്യ, ഉണ്ണി മുകന്ദൻ തുടങ്ങിയവരുടെ ഫേസ്ബുക് പേജിലൂടെയാണ് ട്രെയ്‌ലർ പുറത്ത് വിട്ടത്.

ഡേവിഡ് ജോൺ മേടയിൽ എന്ന ധനികനായ ഗുണ്ട ആയിട്ടാണ് അനൂപ് മേനോൻ ചിത്രത്തിൽ എത്തുന്നത്. തന്റെ കരിയറിലെ തന്നെ ഏറ്റവും വലിയ ചിത്രമായിരിക്കുമെന്നാണ് അനൂപ് മേനോൻ പറയുന്നത്. ഒപ്പം, ട്വന്റി – 20 ക്ക് ശേഷം 50 ലേറെ താരങ്ങൾ അണിനിരക്കന്നു എന്ന പ്രത്യേകതയും വരാലിനുണ്ട്‌. റേസ്, റീലിജിയൻ, റീട്രിബ്യൂഷൻ എന്ന ടാഗ്‌ലൈനോടെയാണ് വരാൽ എത്തുന്നത്. കേരള കക്ഷി രാഷ്ട്രീയം പ്രമേയം അകുന്നതിനോടോപ്പം കാലിക പ്രസക്തിയുള്ള പല വിഷയങ്ങളെ പറ്റി ചിത്രം സംസാരിക്കുന്നുണ്ടെന്ന് ട്രെയിലറിൽ നിന്ന് വ്യക്തമാണ്.

അനൂപ് മേനോന് പുറമേ പ്രകാശ് രാജ്, രൺജി പണിക്കർ, സുരേഷ് കൃഷ്ണ, ശങ്കർ രാമകൃഷ്ണൻ, സണ്ണി വെയ്ൽ, സെന്തിൽ കൃഷ്ണ , പ്രിയങ്ക നായർ തുടങ്ങിയവരും വേഷമിടുന്നുണ്ട്. കേന്ദ്ര കഥാപാത്രം ചെയ്യുന്നതിന് പുറമേ അനൂപ് മേനോൻ തന്നെയാണ് ചിത്രത്തിന്റെ തിരക്കഥയും തയ്യാറാക്കിയിരിക്കുന്നത്. ടൈം ആഡ്സാണ് ചിത്രം നിർമ്മിച്ചിരിക്കുന്നത്. സംഗീത സംവിധാനം നിർവഹിച്ചിരിക്കുന്നത് ഗോപി സുന്ദറാണ്. രവിചന്ദ്രനാണ് ഛായഗ്രഹണം നിർവഹിക്കുന്നത്, അയൂബ് ഖാൻ എഡിറ്റിംഗും നിർവഹിച്ചിരിക്കുന്നു. ചിത്രം ഈ മാസം 14 ന് തിയ്യറ്ററുകളിലെത്തും.