മണി ഹെയ്‌സ്‌റ്റിലെ ടോക്കിയോ മലയാളത്തിലോ? കൽവത്തി ഡേയ്സിലെ ബെന്നി ദയാൽ പാടിയ പാട്ടെത്തി..!

പുതുമുഖങ്ങൾക്ക് അവസരം നൽകി കൊണ്ട് ഒരുക്കിയ മലയാള ചിത്രമാണ് കൽവത്തി ഡേയ്‌സ്. വർഷങ്ങളോളം സിനിമയിൽ ജൂനിയർ ആർട്ടിസ്റ്റുകളായി പിൻനിരയിൽ സജീവമായി നിന്ന കുറച്ചു സുഹൃത്തുക്കളെ മലയാള സിനിമയുടെ മുൻനിരയിലേക്ക് പരിചയപ്പെടുത്തുന്ന ഈ ചിത്രം നവാഗതനായ നിഷാദ് കെ സലിം ആണ് രചിച്ചു സംവിധാനം ചെയ്തിരിക്കുന്നത്. ജൂനിയര്‍ ആര്‍ട്ടിസ്റ്റുകളായ ജെനി ഹരിഹരന്‍, ജാഫർ കടുവ, അഖിൽ അക്കു, ജോയിമോൻ ചാത്തനാട്, അജ്മൽ, വർഗ്ഗീസ്സ്, കിരണൻ പിള്ള, റിതു ബാബു, രജിന്ത്, അജ്മിന കാസിം, റിയ മറിയം, അഞ്ജു ജോസഫ് തുടങ്ങിയവരാണ് ഈ ചിത്രത്തിലെ പ്രധാന കഥാപാതങ്ങളെ അവതരിപ്പിക്കുന്നത്. ഇ എം എന്റര്‍ടെെയ്ന്‍മെന്റസ്സിന്റെ ബാനറില്‍ തോമസ്സ് ജോർജ്ജ്, ജിബിൻ കാദുത്തുസ് എന്നിവർ നിർമ്മിക്കുന്ന ഈ ചിത്രത്തിന് വേണ്ടി ക്യാമറ ചലിപ്പിച്ചിരിക്കുന്നതു ജോമോൻ കെ പോളും സംഗീത സംവിധാനം നിർവഹിച്ചിരിക്കുന്നത് നിസാം എച്, ഷൈജു അവറാൻ എന്നിവർ ചേർന്നുമാണ്.

ഇപ്പോഴിതാ നിസാം എച് ഈണം നൽകിയ ഈ ചിത്രത്തിലെ പുതിയ ഗാനത്തിന്റെ വീഡിയോ റിലീസ് ചെയ്തിരിക്കുകയാണ്. ലോക പ്രശസ്ത വെബ് സീരിസ് ആയ മണി ഹെയ്‌സ്‌റ്റിലെ ടോക്കിയോ എന്ന കഥാപാത്രത്തിന്റെ ലുക്കിലുള്ള ഒരു പെൺകുട്ടിയുടെ സാന്നിധ്യം ഈ വീഡിയോക്ക് കൗതുകം പകരുന്നു. ബെന്നി ദയാൽ പാടിയ അക്കട്‌ ബക്കഡ് എന്ന് തുടങ്ങുന്ന ഈ ഗാനത്തിന് വരികൾ എഴുതിയിരിക്കുന്നത് നാഗേഷ് രാജൻ (ഹിന്ദി), മധു മലർന്ഡ്ബാൻ (തമിഴ്) എന്നിവർ ചേർന്നാണ്. സുനിൽ ലാവണ്യ കലാ സംവിധാനം നിർവഹിച്ച ഈ ചിത്രത്തിന് വേണ്ടി മേക് അപ്പ് വിഭാഗം കൈകാര്യം ചെയ്തത് രഞ്ജിത്തും വസ്ത്രാലങ്കാരം നിർവഹിച്ചത് പ്രദീപും ആണ്. ദീപക് പറന്തമണ് എഡിറ്റിംഗ് നിർവഹിച്ചിരിക്കുന്ന കൽവത്തി ഡേയ്‌സിനു വേണ്ടി പ്രശസ്ത സംവിധായകൻ ലാൽ ജോസിന്റെ ശബ്ദത്തിലൂടെ പുറത്തു വിട്ട മേക്കിങ് വീഡിയോ നേരത്തെ തന്നെ ശ്രദ്ധ നേടിയിരുന്നു. ഇതിന്റെ രസകരമായ ലൊക്കേഷൻ വീഡിയോയും ടൈറ്റിൽ പോസ്റ്ററുമെല്ലാം നേരത്തെ പുറത്തു വരികയും പ്രേക്ഷക ശ്രദ്ധ നേടുകയും ചെയ്തതാണ്.