ബാലയ്യയുടെ ആദ്യ നൂറു കോടി ചിത്രത്തിന്റെ വിജയം ആഘോഷിച്ചു പുതിയ ട്രൈലെർ; വീഡിയോ കാണാം..!

തെലുങ്ക് സിനിമയിലെ സൂപ്പർ താരങ്ങളിൽ ഒരാളായ നന്ദമുറി ബാലകൃഷ്ണ എന്ന ബാലയ്യ നായകനായ പുതിയ ചിത്രം അഖണ്ഡ ഈ കഴിഞ്ഞ ഡിസംബർ രണ്ടിന് ആണ് റിലീസ് ചെയ്തത്. ടീസർ, ട്രൈലെർ എന്നിവ സൂപ്പർ ഹിറ്റായി മാറിയത് കൊണ്ട് തന്നെ വമ്പൻ പ്രതീക്ഷയോടെ ആരാധകർ കാത്തിരുന്ന ഈ ചിത്രം, പ്രേക്ഷകരുടെ പ്രതീക്ഷകളെ സാധൂകരിച്ചു എന്നു മാത്രമല്ല, ബോക്സ് ഓഫീസിൽ ആദ്യമായി ബാലയ്യക്ക് നൂറു കോടി കളക്ഷൻ നേടുന്ന ഒരു ചിത്രവും ഇതിലൂടെ ലഭിച്ചു. ഇപ്പോഴിതാ ഈ ചിത്രത്തിന്റെ വിജയം ആഘോഷിച്ചു കൊണ്ടുള്ള പുതിയ ട്രയ്ലർ യൂട്യൂബിൽ ട്രെൻഡിങ് ആയി മാറിക്കൊണ്ടിരിക്കുകയാണ്. ചിത്രം അൻപത് ദിവസം പിന്നിട്ടത് ആഘോഷിച്ചു കൊണ്ടാണ് ഈ ട്രൈലെർ വന്നിരിക്കുന്നത്. അധികം വൈകാതെ തന്നെ ഈ ചിത്രം ഒറ്റിറ്റി പ്ലാറ്റ്‌ഫോമിലും റിലീസ് ചെയ്യും എന്നാണ് റിപ്പോർട്ടുകൾ പറയുന്നത്. ഏതായാലും ബാലയ്യ ആരാധകരെ ത്രസിപ്പിക്കുന്ന രീതിയിൽ തന്നെയാണ് ഈ പുതിയ ട്രൈലെറും അവർ പുറത്തു വിട്ടിരിക്കുന്നത്.

സൂപ്പർ ഹിറ്റ് സംവിധായകനായ ബോയപ്പട്ടി ശ്രീനു ഒരുക്കിയ ഈ മാസ്സ് ആക്ഷൻ ചിത്രം, ദ്വാരക ക്രിയേഷൻസിന്റെ ബാനറിൽ മിര്യാല രവിന്ദർ റെഡ്ഢിയാണ് നിർമ്മിച്ചിരിക്കുന്നത്. ബാലയ്യ എന്ന ബാലകൃഷ്ണയുടെ 106 ആം ചിത്രമായിരുന്നു അഖണ്ഡ. ബാലയ്യയുടെ കിടിലൻ ആക്ഷൻ രംഗങ്ങൾ ആണ് ഈ ചിത്രത്തിന്റെ ഏറ്റവും വലിയ ഹൈലൈറ്റ്. ബാലയ്യ കൂടാതെ പ്രഘ്യാ ജൈസ്വാൾ, ശ്രീകാന്ത് എന്നിവരും അഭിനയിച്ച ഈ ചിത്രം വമ്പൻ ബഡ്ജറ്റിലാണ് ഒരുക്കിയത്. സിംഹ, ലെജൻഡ് എന്നീ ചിത്രങ്ങൾക്ക് ശേഷം ബാലയ്യ- ബോയപ്പട്ടി ശ്രീനു ടീം ഒന്നിച്ച ചിത്രം കൂടിയാണ് അഖണ്ഡ. ഈ കൂട്ടുകെട്ടിന്റെ ഹാട്രിക് വിജയമാണ് ഈ ചിത്രം നേടിയത്.