വിനീത് ശ്രീനിവാസന്‍ നായകനാകുന്ന ‘ആന അലറലോടലറലി’ ലെ ആദ്യ ഗാനം ഇതാ

നവാഗതനായ ദിലീപ് മേനോന്റെ സംവിധാനത്തിൽ വിനീത് ശ്രീനിവാസന്‍ നായകനാകുന്ന പുതിയ ചിത്രമാണ് ‘ആന അലറലോടലറല്‍’. ചിത്രത്തിലെ ‘സുന്നത്ത് കല്യാണം’ എന്ന പാട്ട് അണിയറ പ്രവർത്തകർ പുറത്തുവിട്ടു. വിനീത് ശ്രീനിവാസന്റെ വരികൾക്ക് ഷാൻ റഹ്മാനാണ് ഈണം നൽകിയിരിക്കുന്നത്. ഹാസ്യ രസ പ്രാധാന്യമുള്ള ചെറുപ്പക്കാരനായിട്ടാണ് വിനീത് ഈ ചിത്രത്തിൽ പ്രത്യക്ഷപ്പെടുന്നത്. ‘സുന്നത് കല്യാണം’ എന്ന ഗാനവും ഹാസ്യം കൂട്ടിയിണക്കിയാണ് ഒരുക്കിയിരിക്കുന്നത്. ചിത്രത്തിന്റെ ഫസ്റ്റ്ലുക്ക് പോസ്റ്റർ മുൻപ് തന്നെ പ്രേക്ഷകശ്രദ്ധ നേടിയിരുന്നു.

ശേഖരന്‍കുട്ടി എന്ന് വിളിക്കുന്ന ഒരു ആനയാണ് ചിത്രത്തിലെ കേന്ദ്ര കഥാപാത്രം. ഹാഷിം ജലാലുദ്ദീന്‍ എന്ന കഥാപാത്രത്തെയാണ് വിനീത് ചിത്രത്തില്‍ അവതരിപ്പിക്കുന്നത്. തികച്ചും ഗ്രാമീണനായ ഹാഷിമും ഗ്രാമത്തിലെത്തുന്ന ആനയും തമ്മിലുള്ള സൗഹൃദവും ഹാഷിമിന്റെ പ്രണയവുമാണ് ചിത്രത്തിന്റെ ഇതിവൃത്തം.

അനു സിത്താരയാണ് ആന അലറലോടലറലിലെ നായിക. നവാഗതനായ ശരത് ബാലന്‍ തിരക്കഥ ഒരുക്കിയിരിക്കുന്ന ചിത്രത്തില്‍ സുരാജ് വെഞ്ഞാറമൂട്, തെസ്‌നി ഖാൻ, മാമുക്കോയ, ആനന്ദം ഫെയിം വിശാഖ്,ഇന്ദ്രൻസ് എന്നിവർ മറ്റ് കഥാപാത്രങ്ങളെ അവതരിപ്പിക്കുന്നു.പോയട്രി ഫിലിംഹൗസിന്‍റെ ബാനറില്‍ സിബി തോട്ടുപുറം, നേവിസ് സേവ്യര്‍ എന്നിവര്‍ ചേര്‍ന്നാണ് ചിത്രം നിര്‍മിക്കുന്നത്