ആരാധകരെ ഇളക്കി മറിക്കുന്ന മാസ്സ് ടൈറ്റിൽ സോങ്ങുമായി കാല..

ലോകമെമ്പാടുമുള്ള രജനികാന്ത് ആരാധകർ ആവേശത്തോടെ കാത്തിരിക്കുന്ന ചിത്രമാണ് പാ രഞ്ജിത്ത് സംവിധാനം ചെയ്ത കാല. ധനുഷ് നിർമ്മിച്ച ഈ ചിത്രം വരുന്ന ജൂൺ മാസം ഏഴിനാണ് റിലീസ് ചെയ്യാൻ പോകുന്നത്. ഇപ്പോഴിതാ അതിനു മുന്നോടിയായി ഈ ചിത്രത്തിലെ ഗാനങ്ങൾ റിലീസ് ചെയ്തു കഴിഞ്ഞു. ഏകദേശം ഒമ്പതോളം ഗാനങ്ങൾ അടങ്ങിയ ആൽബം ആണ് കാലക്കു വേണ്ടി ഒരുക്കിയിരിക്കുന്നത്. പാ രഞ്ജിത്ത് – രജനികാന്ത് ചിത്രമായ കബാലിക്ക് വേണ്ടി സംഗീതമൊരുക്കിയ സന്തോഷ് നാരായണൻ തന്നെയാണ് കാലക്കു വേണ്ടിയും സംഗീതം നൽകിയിരിക്കുന്നത്. ഈ ചിത്രത്തിന്റെ ടൈറ്റിൽ സോങ് ആരാധകരെ ഇളക്കി മറിക്കുന്ന രീതിയിൽ മാസ്സ് ആയി തന്നെയാണ് സന്തോഷ് ഒരുക്കിയിരിക്കുന്നത്. ഗാനങ്ങൾ റിലീസ് ആയി മിനിറ്റുകൾക്കുള്ളിൽ തന്നെ ഈ ടൈറ്റിൽ സോങ് ട്രെൻഡ് ആയി കഴിഞ്ഞു.

രജനികാന്ത് ആരാധകരെ ത്രസിപ്പിക്കുന്ന കിടിലൻ ദൃശ്യവല്ക്കരണവും ഈ പാട്ടിനു ഉണ്ടാകുമെന്നാണ് റിപ്പോർട്ടുകൾ പറയുന്നത്. കാലയുടെ ടീസർ നേരത്തെ തന്നെ വന്നിരുന്നു എന്ന് മാത്രമല്ല ഗംഭീര പ്രതികരണമാണ് ഈ ടീസർ നേടിയെടുത്തത്. രജനികാന്തിനെ കൂടാതെ സമുദ്രക്കനി, നാനാ പട്ടേക്കർ, ഹുമ ഖുറേഷി, ഈശ്വരി റാവു, സമ്പത് രാജ്, തുടങ്ങി ഒരു വമ്പൻ താര നിര തന്നെ ഈ ചിത്രത്തിൽ അണിനിരക്കുന്നുണ്ട്. മുരളി ജി ദൃശ്യങ്ങൾ ഒരുക്കിയ ഈ ചിത്രം എഡിറ്റ് ചെയ്തിരിക്കുന്നത് ശ്രീകർ പ്രസാദ് ആണ്. കാല എന്ന അധോലോക നായകൻ ആയാണ് രജനികാന്ത് ഈ ചിത്രത്തിൽ അഭിനയിച്ചിരിക്കുന്നത്. പാ രഞ്ജിത്തിന്റെ മുൻ ചിത്രമായ കബാലിയിലും അധോലോക നായകനായ ടൈറ്റിൽ കഥാപാത്രത്തെ ആയിരുന്നു സൂപ്പർ സ്റ്റാർ രജനി അവതരിപ്പിച്ചത്. ആ ചിത്രത്തിലെയും ടൈറ്റിൽ സോങ് വമ്പൻ ഹിറ്റായിരുന്നു.