കുമ്പളങ്ങി നൈറ്റ്സ് സംവിധായകന്റെ ചിത്രത്തിൽ ടോവിനോ തോമസ്?

2019 ൽ പുറത്തിറങ്ങി സൂപ്പർ വിജയം നേടിയ ‘കുമ്പളങ്ങി നൈറ്റ്സ്’ എന്ന ചിത്രത്തിന് ശേഷം മധു സി നാരായണൻ സംവിധാനം ചെയ്യാൻ പോകുന്ന ചിത്രത്തിൽ ടോവിനോ തോമസ് നായകനായി എത്തുമെന്ന് വാർത്തകൾ. ചിത്രത്തിന്റെ ചർച്ചകൾ പുരോഗമിക്കുകയാണെന്നും ടോവിനോക്ക് ചിത്രത്തിന്റെ കഥ ഇഷ്ടപെട്ടെന്നുമാണ് റിപ്പോർട്ട്. നേരത്തെ യുവതാരം നസ്ലനെ വെച്ചാണ് മധു തന്റെ രണ്ടാം ചിത്രം ചെയ്യുക എന്ന് വാർത്തകൾ വന്നിരുന്നു. എന്നാൽ അതിന് ശേഷം ആ ചിത്രത്തെ കുറിച്ച് കൂടുതൽ വിവരങ്ങൾ ഒന്നും തന്നെ പുറത്തു വന്നില്ല. നസ്ലന്റെ തിരക്കുകൾ മൂലം ചിത്രം മാറ്റി വെച്ചതാണോ ആ ചിത്രം ഉപേക്ഷിച്ചോ എന്നതിനെ കുറിച്ചും ഔദ്യോഗിക സ്ഥിരീകരണം ലഭ്യമല്ല. ഒരു മോഹൻലാൽ ചിത്രവും മധു സി നാരായണൻ പ്ലാൻ ചെയ്യുന്നുണ്ടെന്നും റിപ്പോർട്ടുകൾ പ്രചരിച്ചിരുന്നു. കുമ്പളങ്ങി നൈറ്റ്സ് പോലെ, പ്രമേയം കൊണ്ടും പ്രകടനങ്ങൾ കൊണ്ടും പ്രേക്ഷകരുടെ കയ്യടി നേടുന്ന ഒരു ചിത്രവുമായാവും മധു സി നാരായണൻ വീണ്ടും എത്തുക എന്നാണ് പ്രേക്ഷകരുടെ പ്രതീക്ഷ.

Tovino Thomas in talks with Madhu C Narayanan for a potential collaboration