വീണ്ടും റെക്കോർഡ് ഇട്ട് വില്ലൻ; ഹിന്ദി ഡബ്ബിങ് റൈറ്റ്‌സിന് ലഭിച്ചത് 3 കോടി

റിലീസിന് മുൻപേ റെക്കോർഡുകളുടെ പെരുമഴ തീർക്കുകയാണ് മോഹൻലാൽ നായകനായ വില്ലൻ. ബി ഉണ്ണികൃഷ്ണൻ രചനയും സംവിധാനവും നിർവഹിച്ച ഈ ചിത്രം ഈ വരുന്ന ഒക്ടോബര് 27 നു പ്രദർശനം ആരംഭിക്കുകയാണ്. വമ്പൻ ബഡ്ജറ്റിൽ ഒരുക്കിയിരിക്കുന്ന ഈ സ്റ്റൈലിഷ് ക്രൈം ത്രില്ലറിൽ മോഹൻലാലിനൊപ്പം വിശാൽ, മഞ്ജു വാര്യർ, ഹൻസിക, രാശി ഖന്ന, ശ്രീകാന്ത്, സിദ്ദിഖ്, രഞ്ജി പണിക്കർ, ചെമ്പൻ വിനോദ്, അജു വർഗീസ് എന്നിവരും വേഷമിട്ടിരിക്കുന്നു.

തമിഴിലും തെലുങ്കിലും കൂടി ഇറക്കുന്ന ഈ ചിത്രം ഇന്ത്യൻ സിനിമയിൽ തന്നെ ആദ്യമായി പൂർണ്ണമായും 8 K റെസൊല്യൂഷനിൽ ചിത്രീകരിച്ചിരിക്കുന്ന ചിത്രമാണ്. റിലീസിന് മുൻപേ തന്നെ സൂര്യ ടിവിയിൽ നിന്ന് 7 കോടി രൂപ സാറ്റലൈറ്റ് റൈറ്സ് നേടി റെക്കോർഡ് സൃഷ്‌ടിച്ച ഈ ചിത്രത്തിന്റെ ഓഡിയോ റൈറ്റ്‌സും മലയാളത്തിലെ പുതിയ റെക്കോർഡ് ആണ്. 50 ലക്ഷം രൂപയ്ക്കാണ് ഈ ചിത്രത്തിന്റെ ഓഡിയോ റൈറ്റ്‌സ് ജംഗലീ മ്യൂസിക് സ്വന്തമാക്കിയത്.

ഇപ്പോൾ ഇതാ ഹിന്ദി ഡബ്ബിങ് റൈറ്റ്സിലും ഈ ചിത്രം റെക്കോർഡ് നേടിയിരിക്കുകയാണ്. ഒരു കോടി രൂപയ്ക്കാണ് ചിത്രത്തിന്റെ ഹിന്ദി ഡബ്ബിങ് റൈറ്റ്‌സ് വിറ്റു പോയത് എന്ന് ആദ്യം റിപ്പോർട്ടുകൾ ഉണ്ടായിരുന്നെങ്കിലും ഇപ്പോൾ ചിത്രത്തോടടുത്ത വൃത്തങ്ങളിൽ നിന്ന് ലഭിച്ച വിവര പ്രകാരം 3 കോടി രൂപയ്ക്കാണ് ഈ ചിത്രത്തിന്റെ ഹിന്ദി ഡബ്ബിങ് റൈറ്റ്‌സ് വിറ്റു പോയത്.

മലയാളത്തിൽ ഇത് വരെ ഒരു ചിത്രത്തിന് പോലും ഒരു കോടി രൂപ പോലും ഹിന്ദി ഡബ്ബിങ് റൈറ്റ്‌സ് ലഭിച്ചിട്ടില്ല എന്നിരിക്കെ വമ്പൻ റെക്കോർഡ് ആണ് വില്ലൻ നേടിയിരിക്കുന്നത്.

ഇതോടെ ചിത്രത്തിന്റെ പ്രീ-റിലീസ് ബിസിനസ് 10.5 കോടി രൂപയായി ഉയർന്നിരിക്കുകയാണ്. 15 കോടി രൂപയുടെ പ്രീ-റിലീസ് ബിസിനസ് നടത്തിയ പുലി മുരുകന് ശേഷം മലയാളത്തിൽ ഏറ്റവും വലിയ പ്രീ-റിലീസ് ബിസിനസ് നടത്തിയ ചിത്രമായി മാറിയിരിക്കുകയാണ് ഈ മോഹൻലാൽ ചിത്രം. റോക്ക് ലൈൻ വെങ്കടേഷ് ആണ് ഈ ചിത്രം നിർമ്മിച്ചിരിക്കുന്നത്