വിക്രം 3ല്‍ ദളപതി വിജയ് ഉണ്ടാകുമോ; വെളിപ്പെടുത്തി കമൽ ഹാസൻ

സൂപ്പർ ഹിറ്റ് സംവിധായകൻ ലോകേഷ് കനകരാജ് ഒരുക്കി, ഉലക നായകൻ കമല്‍ ഹാസന്‍ നായകനായെത്തുന്ന വിക്രം ജൂണ്‍ മൂന്നിനാണ് ആഗോള റിലീസായെത്തുന്നത്. ഇപ്പോൾ വമ്പൻ പ്രൊമോഷൻ പരിപാടികളാണ് ഈ ചിത്രത്തിനു വേണ്ടി നടന്നു കൊണ്ടിരിക്കുന്നത്. ഫഹദ് ഫാസിൽ, വിജയ് സേതുപതി എന്നിവരും നിർണ്ണായകമായ വേഷങ്ങൾ ചെയ്യുന്ന ഈ ചിത്രത്തിൽ നടിപ്പിൻ നായകൻ സൂര്യയും അതിഥി വേഷത്തില്‍ എത്തുന്നുണ്ടെന്ന് അണിയറ പ്രവർത്തകർ സ്ഥിതീകരിച്ചിരുന്നു. അത് കൂടാതെ വിക്രം സിനിമക്ക് മൂന്ന് ഭാഗങ്ങള്‍ ഉണ്ടാകുമെന്നും കമല്‍ ഹാസന്‍ വെളിപ്പെടുത്തിയിരുന്നു. ഇപ്പോഴിതാ വിക്രം 3 ഇൽ ദളപതി വിജയ് ഉണ്ടാകുമോ എന്നുള്ള ആരാധകന്റെ ചോദ്യത്തിന് മറുപടി നൽകിയിരിക്കുകയാണ് കമൽ ഹാസൻ.

വിക്രം സിനിമയുടെ പ്രൊമോഷനുമായി ബന്ധപ്പെട്ട് നടന്ന പരിപാടിയിലാണ് ചോദ്യം ഉണ്ടായത്. നേരെത്തെ തന്നെ വിക്രം മൂന്നിലേക്ക് ഒരാളെ കണ്ട് വെച്ചിട്ടുണ്ടെന്നും, അതാരാണെന്ന് എല്ലാവര്‍ക്കുമറിയാമെന്നും കമൽ ഹാസൻ പറഞ്ഞു. വിക്രം മൂന്നാം ഭാഗത്തിൽ പ്രധാന വേഷത്തിലെത്തുന്നത് സൂര്യയാണ്. എന്നാൽ പ്രേക്ഷകർ പറയുന്ന പോലെ ദളപതി വിജയ് നായകനായ ഒരു ചിത്രം ചെയ്യാനും രാജ് കമല്‍ പ്രൊഡക്ഷന്‍സ് തയ്യാറാണെന്നും അദ്ദേഹം വെളിപ്പെടുത്തി. രാജ് കമൽ ഇന്റർനാഷണലിന്റെ ബാനറിൽ കമൽ ഹാസൻ തന്നെയാണ് വിക്രം നിർമ്മിച്ചിരിക്കുന്നത്. രത്നകുമാറും ലോകേഷ് കനകരാജും ചേര്‍ന്നാണ് ഈ ചിത്രത്തിന്റെ തിരക്കഥ രചിച്ചിരിക്കുന്നത്. അനിരുദ്ധ് രവിചന്ദർ സംഗീത സംവിധാനം നിർവഹിച്ച ഈ ചിത്രത്തിൽ കാളിദാസ് ജയറാം, നരേൻ, അർജുൻ ദാസ്, ചെമ്പൻ വിനോദ് എന്നിവരുമഭിനയിച്ചിട്ടുണ്ട്. ഏതായാലും വിക്രം 3 ഇൽ പ്രധാന വേഷത്തിലാവും സൂര്യയെത്തുക എന്ന സൂചന കമൽ ഹാസൻ നൽകിയതോടെ ആരാധകർ ആവേശത്തിലാണ്.