വീണ്ടും ഒമർ ലുലു ചിത്രത്തിൽ അഭിനയിക്കുമോ? ഒരു അഡാർ ലൗ നായിക തുറന്നു പറയുന്നു..!

ഈ വരുന്ന ഫെബ്രുവരി പതിനാലിന്, ലോകം പ്രണയ ദിനം ആഘോഷിക്കുമ്പോൾ പ്രേക്ഷകർ ഏറെ കാത്തിരുന്ന ഒരു ചിത്രം കൂടി അന്ന് റിലീസ് ചെയ്യുകയാണ്. ഹാപ്പി വെഡിങ്, ചങ്ക്സ് എന്നീ സൂപ്പർ ഹിറ്റ് ചിത്രങ്ങൾക്ക് ശേഷം പ്രശസ്ത സംവിധായകൻ ഒമർ ലുലു സംവിധാനം ചെയ്‌ത ഒരു അഡാർ ലവ് എന്ന ചിത്രമാണത്. മലയാളം, തെലുങ്ക് ഭാഷകളിൽ ആയി റിലീസ് ചെയ്യുന്ന ഈ റൊമാന്റിക് കോമഡി മൂവിയിൽ പുതുമുഖങ്ങൾ ആണ് കേന്ദ്ര കഥാപാത്രങ്ങളെ അവതരിപ്പിക്കുന്നത്. ഈ ചിത്രത്തിലെ ഗാനങ്ങൾ എല്ലാം സൂപ്പർ ഹിറ്റായി എന്നു മാത്രമല്ല ആ ഗാനങ്ങളിലൂടെ ഇതിലെ പുതുമുഖങ്ങൾ എല്ലാവരും തന്നെ സോഷ്യൽ മീഡിയയിൽ വമ്പൻ പോപുലാരിറ്റി ആണ് നേടിയെടുത്തത്.

ഇന്ത്യ മുഴുവൻ പ്രശസ്തയാണ് ഇപ്പോൾ ഈ ചിത്രത്തിലെ നായികയായ പ്രിയ പ്രകാശ് വാര്യർ. എന്നാൽ ചിതത്തിന്റെ റിലീസിന് മുൻപേ തന്നെ സംവിധായകനും നിർമ്മാതാവും തമ്മിലും, ശേഷം സംവിധായകനും നായികയും തമ്മിലും അസ്വാരസ്യങ്ങൾ ഉടലെടുത്തു എന്ന റിപ്പോർട്ടുകൾ സോഷ്യൽ മീഡിയയിൽ പരന്നിരുന്നു. ആ സാഹചര്യത്തിലാണ് ഈ അടുത്ത് നടന്ന ഒരു മാധ്യമ അഭിമുഖത്തിൽ ഒമർ ലുലു സംവിധാനം ചെയ്യുന്ന ഒരു ചിത്രത്തിലേക്ക് ഇനിയും ക്ഷണം വന്നാൽ പോയി അഭിനയിക്കുമോ എന്ന ചോദ്യം പ്രിയക്കു നേരിടേണ്ടി വന്നത്. ഇല്ല എന്ന ഉത്തരം പ്രതീക്ഷിച്ചവരെ ഞെട്ടിച്ചു കൊണ്ട് പ്രിയ പറഞ്ഞത്, നല്ല ഒരു പ്രമേയവുമായി ആണ് സമീപിക്കുന്നതെങ്കിൽ അദ്ദേഹം ഒരുക്കുന്ന ചിത്രത്തിൽ അഭിനയിക്കുന്നതിൽ വിരോധം ഒന്നുമില്ല എന്നാണ്. ഔസേപ്പച്ചൻ വാളക്കുഴി നിർമ്മിച്ച ഒരു അഡാർ ലവിന്റെ തെലുങ്കു ലോഞ്ച് നിർവഹിച്ചത് സ്റ്റൈലിഷ് സ്റ്റാർ അല്ലു അർജുൻ ആണ്.