മോഹൻലാലിനെ പോലെയാണ് മഞ്ജു വാര്യർ; വെളിപ്പെടുത്തലുമായി പ്രശസ്ത നിർമ്മാതാവ്..!

മലയാളത്തിന്റെ ലേഡി സൂപ്പർ സ്റ്റാർ എന്നറിയപ്പെടുന്ന നായികാ താരമാണ് മഞ്ജു വാര്യർ. മലയാള സിനിമ കണ്ട ഏറ്റവും മികച്ച നടിമാരുടെ കൂട്ടത്തിലാണ് മഞ്ജു വാര്യർക്ക് സ്ഥാനം. താരമൂല്യത്തിന്റെ കാര്യത്തിലും മഞ്ജു വാര്യർക്ക് പകരം വെക്കാവുന്ന ഒരു നടി ഇന്ന് മലയാള സിനിമയിലില്ല. ഇപ്പോഴിതാ മഞ്ജു വാര്യരെ അഭിനയത്തിന്റെ കാര്യത്തിൽ മലയാളത്തിന്റെ മഹാനടൻ കംപ്ലീറ്റ് ആക്ടർ മോഹൻലാലുമായി താരതമ്യം ചെയ്തു കൊണ്ട് മുന്നോട്ടു വന്നിരിക്കുകയാണ്, പ്രശസ്ത നിർമ്മാതാവായ പി വി ഗംഗാധരൻ. അങ്ങാടി, അഹിംസ, കാറ്റത്തെ കിളിക്കൂട്, ഒരു വടക്കൻ വീരഗാഥ, വാർത്ത, അദ്വെയ്തം, ഏകലവ്യൻ, തൂവൽ കൊട്ടാരം, വീണ്ടും ചില വീട്ടുകാര്യങ്ങൾ, ശാന്തം, അച്ചുവിന്റെ അമ്മ തുടങ്ങി ഒട്ടേറെ ക്ലാസിക് ചിത്രങ്ങൾ നമ്മുക്ക് സമ്മാനിച്ച നിർമ്മാതാവ് ആണ് പി വി ഗംഗാധരൻ. കൗമുദി മൂവിസിന് നല്‍കിയ അഭിമുഖത്തിലാണ് മഞ്ജു വാര്യരെ പറ്റി അദ്ദേഹം പറയുന്നത്.

മഞ്ജു വാര്യരുടെ അഭിനയം മോഹന്‍ലാലിന്റേത് പോലെയാണെന്ന് തോന്നിയിട്ടുണ്ടെന്ന് ആണ് അദ്ദേഹം പറയുന്നത്. മാനസികമായി എന്ത് വിഷമമുണ്ടെങ്കിലും അതൊക്കെ മാറ്റിവെച്ച് മഞ്ജു നന്നായി അഭിനയിക്കുമെന്നും അഭിനയത്തിന്റെ കാര്യം നോക്കിയാൽ അവർ ഒരു സൂപ്പർ ലേഡി ആണെന്നും അദ്ദേഹം പറയുന്നു. തൂവല്‍ കൊട്ടാരത്തില്‍ അഭിനയിക്കാന്‍ വിളിച്ചപ്പോള്‍ വളരെ സന്തോഷത്തോടെയാണ് മഞ്ജു വാര്യര്‍ വന്നതെന്ന് പറഞ്ഞ പി വി ഗംഗാധരൻ, മറ്റുള്ളവരെ സഹായിക്കാനുള്ള ഒരു മനസ്ഥിതി ഉള്ള, ആരും അറിയാതെ പലരെയും സഹായിച്ചിട്ടുള്ള ആള് കൂടിയാണ് മഞ്ജു വാര്യർ എന്നും വെളിപ്പെടുത്തുന്നു. ഇന്ന് മലയാളത്തിലെ ഏറ്റവും തിരക്കുള്ള നായികതാരമാണ് മഞ്ജു വാര്യർ. ലളിതം സുന്ദരം എന്ന ഒറ്റിറ്റി റിലീസ് ആയിരുന്നു മഞ്ജുവിന്റെ ഏറ്റവും പുതിയ ചിത്രം.