ഷാജി കൈലാസ് ചിത്രത്തിൽ ഫഹദ് ഫാസിൽ?; വെളിപ്പെടുത്തി സംവിധായകൻ

മലയാളത്തിലെ മാസ്സ് സിനിമകളുടെ തമ്പുരാക്കന്മാരിലൊരാളാണ് ഷാജി കൈലാസ്. അദ്ദേഹം നമ്മുക്ക് മുന്നിലെത്തിച്ചിട്ടുള്ള മാസ്സ് ചിത്രങ്ങൾ ഒട്ടേറെയാണ്. തലസ്ഥാനം, ഏകലവ്യൻ, കമ്മീഷണർ, ദി കിംഗ്, ആറാം തമ്പുരാൻ, നരസിംഹം, വല്യേട്ടൻ, നാട്ടു രാജാവ്, ദി ടൈഗർ, ചിന്താമണി കൊലക്കേസ് തുടങ്ങി ഒട്ടേറെ വലിയ ഹിറ്റുകൾ സമ്മാനിച്ച ഷാജി കൈലാസ് ഒരിടവേളക്ക് ശേഷം തിരിച്ചു വന്ന ചിത്രമാണ് പൃഥ്വിരാജ് സുകുമാരൻ നായകനായ കടുവ. ബ്ലോക്ക്ബസ്റ്റർ വിജയം നേടിയ ഈ ചിത്രം അടുത്തിടെ അമ്പതു കോടി ക്ലബിലും ഇടം നേടിയിരുന്നു. ഇപ്പോൾ പൃഥ്വിരാജ്, ആസിഫ് അലി എന്നിവർ പ്രധാന വേഷങ്ങൾ ചെയ്യുന്ന കാപ്പ എന്ന ചിത്രമാണ് അദ്ദേഹം സംവിധാനം ചെയ്യുന്നത്. മോഹൻലാൽ, സുരേഷ് ഗോപി എന്നിവർ നായകന്മാരാകുന്ന ചിത്രവും അദ്ദേഹം പ്ലാൻ ചെയ്യുന്നുണ്ട്. ഇപ്പോഴിതാ, ഫഹദ് ഫാസിലിനൊപ്പം ഒരു ചിത്രം ചെയ്യുന്നതിനെ കുറിച്ച് ഷാജി കൈലാസ് മനസ്സ് തുറക്കുകയാണ്.

ഫഹദ് നായകനായ മലയൻകുഞ്ഞിന്റെ സ്പെഷ്യൽ ഷോ കാണാൻ ഫാസിലും ഫാമിലിയും എത്തിയപ്പോൾ അവിടെ വെച്ചാണ് താൻ അടുത്തിടെ ഫഹദിനെ നേരിട്ട് കണ്ടതെന്നും, തന്നെ കണ്ടപ്പോൾ ഫഹദ് ഓടി അടുത്ത് വന്നെന്നും ഷാജി കൈലാസ് പറയുന്നു. തമിഴ്, തെലുങ്കു ഭാഷകളിലെ കൊമേർഷ്യൽ മാസ്സ് ചിത്രങ്ങളിൽ ഗംഭീര പ്രകടനം കാഴ്ചവെച്ച ഫഹദിനോട് മലയാളത്തിലും അത്തരം ചിത്രങ്ങൾ ചെയ്യാനും, തങ്ങളെ പോലെയുള്ളവരുടെ കൂടെ അതുപോലത്തെ ചിത്രങ്ങളിൽ ജോലി ചെയ്യാനുമാണ് താൻ പറഞ്ഞതെന്നും ഷാജി കൈലാസ് വെളിപ്പെടുത്തുന്നു. ഫഹദിനെയൊക്കെ വെച്ച് ചിത്രങ്ങൾ ചെയ്യാൻ തനിക്ക് ആഗ്രഹമുണ്ടെന്നും, അതിനു അവർ കൂടി തയ്യാറായാൽ സിനിമകൾ സംഭവിക്കുമെന്നും അദ്ദേഹം പറഞ്ഞു. ക്യാൻ ചാനൽ മീഡിയക്കു നൽകിയ അഭിമുഖത്തിലാണ് ഷാജി കൈലാസ് മനസ്സ് തുറക്കുന്നത്. മോഹൻലാൽ നായകനായി എത്തുന്ന എലോൺ എന്ന ഒടിടി ചിത്രമാണ് ഇനി ഷാജി കൈലാസിന്റെ റിലീസ്.