ദീപാവലിക്കു വമ്പൻ ഹിറ്റാവാൻ വിശാലിന്റെ എനിമി എത്തുന്നു..!

തമിഴിലെ വലിയ താരങ്ങളായ വിശാൽ, ആര്യ എന്നിവർ ഒരുമിച്ചു എത്തുന്ന പുതിയ ചിത്രമാണ് എനിമി. അവൻ ഇവൻ എന്ന ചിത്രത്തിന് ശേഷം വിശാൽ- ആര്യ ടീം ഒരുമിച്ചു എത്തുന്ന ചിത്രമാണ് ഇത്. അടുത്ത സുഹൃത്തുക്കളായ ഇരുവരും ഈ ചിത്രത്തിൽ നേർക്ക് നേർ പോരാടുന്ന കഥാപാത്രങ്ങൾ ആയാണ് എത്തുന്നത് എന്ന സൂചനയാണ് ഇതുവരെ പുറത്തു വന്ന ഇതിന്റെ ടീസർ, ട്രൈലെർ എന്നിവ തരുന്നത്. വലിയ പ്രേക്ഷക ശ്രദ്ധയാണ് ഈ മാസ്സ് ആക്ഷൻ ചിത്രത്തിന്റെ ട്രൈലെർ നേടിയെടുത്തിരിക്കുന്നത്. ദീപാവലി റിലീസ് ആയി നവംബർ നാലിന് എത്തുന്ന ഈ ചിത്രത്തെ കുറിച്ച് വലിയ പ്രതീക്ഷയാണ് പ്രേക്ഷകർക്കും അണിയറ പ്രവർത്തകർക്കും ഉള്ളത്. ചിത്രം വമ്പൻ ഹിറ്റായി മാറുമെന്ന് തന്നെയാണ് ഏവരും വിചാരിക്കുന്നത്. സൂപ്പർ ഹിറ്റുകൾ ഒരുക്കിയ സംവിധായകൻ ആനന്ദ് ശങ്കർ ആണ് ഈ ചിത്രം സംവിധാനം ചെയ്തിരിക്കുന്നത്. അദ്ദേഹം തന്നെ രചിക്കുകയും ചെയ്തിരിക്കുന്ന ഈ ചിത്രം മിനി സ്റ്റുഡിയോയുടെ ബാനറിൽ എസ് വിനോദ് കുമാർ ആണ് നിർമ്മിച്ചിരിക്കുന്നത്.

മൃണാളിനി രവി, മമത മോഹൻദാസ്, തമ്പി രാമയ്യ, പ്രകാശ് രാജ്, കരുണാകരൻ എന്നിവരും അഭിനയിച്ചിരിക്കുന്ന ഈ ചിത്രത്തിന് കാമറ ചലിപ്പിച്ചിരിക്കുന്നതു ആർ ഡി രാജേശഖരനും എഡിറ്റ് ചെയ്തിരിക്കുന്നത് റെയ്മണ്ട് ഡെറിക് ക്രസ്റ്റായും ആണ്. സാം എസി എസ് പശ്ചാത്തല സംഗീതമൊരുക്കിയ ഇതിലെ ഗാനങ്ങൾക്ക് ഈണം പകർന്നത് എസ് തമൻ ആണ്. തമിഴ്, തെലുങ്കു ഭാഷകളിലായി റിലീസ് ചെയ്യുന്ന ഈ ചിത്രം സിംഗപ്പൂരിൽ നടക്കുന്ന കഥയാണ് പറയുന്നത്. ഹോളിവുഡ് ആക്ഷൻ ചിത്രങ്ങളെ അനുസ്‌മരിപ്പിക്കുന്ന തരത്തിലാണ് സംവിധായകൻ ഈ ചിത്രം ഒരുക്കിയിരിക്കുന്നത് എന്ന് വിശാൽ പറയുന്നു. ചിത്രം വളരെ നന്നായി വന്നിട്ടുണ്ട് എന്നും ആര്യ ആണ് ഈ കഥ കേൾക്കാൻ തന്നോട് ആവശ്യപ്പെട്ടത്‌ എന്നും വിശാൽ വെളിപ്പെടുത്തി. ആക്ഷൻ രംഗങ്ങളിൽ ഒക്കെ ഗംഭീര പ്രകടനമാണ് ആര്യ കാഴ്ച വെച്ചതെന്നും വിശാൽ പറഞ്ഞു.