ദളപതി വിജയ്‌ക്കൊപ്പം വിശാലും?; കൂടുതൽ വലുതായി ലോകേഷ് കനകരാജ് ചിത്രം

ദളപതി വിജയ്‌യെ നായകനാക്കി ലോകേഷ് കനകരാജ് ഒരുക്കാൻ പോകുന്ന പുത്തൻ ചിത്രത്തിന്റെ വിവരങ്ങൾ അറിയാൻ ആകാംഷയോടെ കാത്തിരിക്കുകയാണ് വിജയ് ആരാധകർ. മാസ്റ്റർ എന്ന സൂപ്പർ ഹിറ്റിനു ശേഷം വിജയ്- ലോകേഷ് കനകരാജ് ടീം ഒന്നിക്കാൻ പോകുന്ന ചിത്രം കൂടിയാണിത്. അതുപോലെ ഉലകനായകൻ കമൽ ഹാസൻ നായകനായ വിക്രം എന്ന ഇൻഡസ്ട്രി ഹിറ്റിനു ശേഷം ലോകേഷ് ഒരുക്കാൻ പോകുന്ന ചിത്രമെന്ന നിലയിലും ഈ വരാൻ പോകുന്ന വിജയ് ചിത്രം ഹൈപ്പ് സൃഷ്ടിക്കുന്നുണ്ട്. ഇതിന്റെ താരനിരയെ കുറിച്ചുള്ള ഒട്ടേറെ വാർത്തകൾ സോഷ്യൽ മീഡിയയിൽ പ്രചരിക്കുന്നുണ്ട്. ബോളിവുഡ് സൂപ്പർ താരം സഞ്ജയ് ദത്ത് വില്ലനായി എത്തുമെന്ന് പ്രതീക്ഷിക്കപ്പെടുന്ന ഈ ചിത്രത്തിൽ നായികാ വേഷം ചെയ്യാൻ പോകുന്നത് തൃഷയാണെന്നാണ് റിപ്പോർട്ടുകൾ സൂചിപ്പിക്കുന്നത്. ഗൗതം വാസുദേവ് മേനോൻ, മിഷ്കിൻ, ആക്ഷൻ കിംഗ് അർജുൻ, മലയാളി യുവ നടൻ മാത്യു തോമസ് എന്നിവരും ഇതിലുണ്ടാകുമെന്ന് വാർത്തകൾ വന്നിരുന്നു.

ഇപ്പോഴിതാ തമിഴ് സൂപ്പർ താരം വിശാലും ഈ ചിത്രത്തിന്റെ ഭാഗമാകുമെന്നാണ് സൂചന. വിശാൽ അഭിനയിക്കുന്ന മാർക്ക് ആന്റണി എന്ന ചിത്രത്തിന്റെ സെറ്റിൽ പോയി ലോകേഷ് വിശാലിനെ കണ്ടിരുന്നു എന്നും വിശാൽ ഈ ചിത്രത്തിൽ അഭിനയിക്കാൻ സമ്മതിച്ചു എന്നുമാണ് വാർത്തകൾ വരുന്നത്. നേരത്തെ മലയാളത്തിന്റെ യുവ താരം നിവിൻ പോളി ഇതിൽ വേഷമിടുമെന്നും വാർത്തകൾ പ്രചരിച്ചിരുന്നു. സെവൻ സ്ക്രീൻ സ്റ്റുഡിയോസ് ആണ് ഈ ചിത്രം നിർമ്മിക്കാൻ പോകുന്നതെന്നും, ഒരു പക്കാ മാസ്സ് ആക്ഷൻ ചിത്രമായിരിക്കും ഇതെന്നും തമിഴ് മാധ്യമങ്ങൾ പുറത്ത് വിട്ടിരുന്നു. വംശി ഒരുക്കുന്ന വാരിസ് ആണ് വിജയ് നായകനായി എത്തുന്ന അടുത്ത റിലീസ്.