വിജയമാവർത്തിക്കാൻ വിനീത് ശ്രീനിവാസൻ; മനോഹരം നാളെ മുതൽ..!

തണ്ണീർമത്തൻ ദിനങ്ങൾ എന്ന ചിത്രത്തിലൂടെ ഈ വർഷം ഒരു ബ്ലോക്ക്ബസ്റ്റർ വിജയം കരസ്ഥമാക്കിയ വിനീത് ശ്രീനിവാസൻ എന്ന നടൻ ആ വിജയം ആവർത്തിക്കാൻ തന്റെ പുതിയ ചിത്രവുമായി നാളെ എത്തുകയാണ്. അൻവർ സാദിഖ് സംവിധാനം ചെയ്ത മനോഹരം എന്ന ചിത്രം നാളെ മുതൽ കേരളത്തിലെ പ്രേക്ഷകരുടെ മുന്നിലേക്ക് എത്തുകയാണ്. മികച്ച റിലീസ് ലഭിച്ചിരിക്കുന്ന ഈ ചിത്രത്തിന്റെ തിയേറ്റർ ലിസ്റ്റ് ഇവിടെ ചേർക്കുന്നു. സംവിധായകൻ തന്നെ രചനയും നിർവഹിച്ചിരിക്കുന്ന ഈ ചിത്രം അദ്ദേഹത്തിന്റെ രണ്ടാമത്തെ സംവിധാന സംരഭം ആണ്. വർഷങ്ങൾക്കു മുൻപ് വിനീത് ശ്രീനിവാസൻ- നമിത പ്രമോദ് ടീമിനെ വെച്ച് ഓർമ്മയുണ്ടോ ഈ മുഖം എന്ന ചിത്രമൊരുക്കിയാണ് അൻവർ സാദിഖ് സംവിധായകൻ ആയി അരങ്ങേറ്റം കുറിച്ചത്. ഇപ്പോൾ അദ്ദേഹം മനോഹരം എന്ന ചിത്രവുമായി വരുമ്പോൾ പേര് പോലെ തന്നെ ഒരു മനോഹര ചിത്രമായിരിക്കും ഇതെന്ന പ്രതീക്ഷയിലാണ് പ്രേക്ഷകർ.

മനു എന്ന് പേരുള്ള വിനീത് ശ്രീനിവാസൻ കഥാപാത്രത്തിന്റെ ചുറ്റും വികസിക്കുന്ന ഈ ചിത്രത്തിൽ ബേസിൽ ജോസെഫ്, ഇന്ദ്രൻസ് എന്നിവരും നിർണ്ണായക കഥാപാത്രങ്ങളെ അവതരിപ്പിക്കുന്നു. ചക്കാലക്കൽ ഫിലിമ്സിന്റെ ബാനറിൽ ജോസ് ചക്കാലക്കൽ, സുനിൽ എ കെ എന്നിവർ ചേർന്ന് നിർമ്മിച്ച ഈ ചിത്രത്തിന് സംഗീതം പകർന്നിരിക്കുന്നത് സഞ്ജീവ് ടി ആണ്. ഹാസ്യവും വൈകാരിക മുഹൂർത്തങ്ങളും പ്രണയവും എല്ലാം നിറഞ്ഞ ഒരു ക്ലീൻ ഫാമിലി എന്റെർറ്റൈനെർ ആയിരിക്കും എന്ന ഫീൽ ആണ് ഇതിന്റെ ട്രൈലെർ, ഗാനങ്ങൾ എന്നിവ നമ്മുക്ക് നൽകുന്നത്. അപർണ്ണ ദാസ്, ദീപക്, ശ്രീലക്ഷ്മി എന്നിവരും ഈ ചിത്രത്തിലെ നിർണ്ണായക വേഷങ്ങൾ ചെയ്യുന്നുണ്ട്.