ആനപ്രേമികൾക്കായി മലയാള സിനിമയിൽ ഒരു ആന ചിത്രം കൂടി വരുന്നു…

ആനയെ കേന്ദ്ര കഥാപാത്രം ആക്കി സിനിമകൾ മലയാളത്തിൽ വന്നിട്ടുണ്ട് എന്ന് മാത്രമല്ല അതിൽ പലതും മലയാളികൾ ഇരു കയ്യും നീട്ടി സ്വീകരിച്ചവയും ആണ്. ഇപ്പോഴും ടെലിവിഷനിൽ പോലും അത്തരം പഴയ ചിത്രങ്ങൾ വരുമ്പോൾ പ്രേക്ഷകർ ഏറെ താല്പര്യത്തോടെ കണ്ടിരിക്കാറുമുണ്ട്. കുട്ടികളെയും കുടുംബ പ്രേക്ഷകരേയുമാണ് അത്തരം സിനിമകൾ എന്നും ആകര്ഷിച്ചിട്ടുള്ളത്. ആനയെ എത്ര കണ്ടാലും മതി വരില്ല എന്ന് പറയുന്നതുപോലെ ആന ചിത്രങ്ങളും മലയാളികൾക്ക് എന്നും പ്രീയപെട്ടതാണ്. അത്തരത്തിൽ ഒരു പുതിയ ചിത്രം കൂടി മലയാളത്തിൽ ഇപ്പോൾ ഒരുങ്ങി കൊണ്ടിരിക്കുകയാണ്.

വിനീത് ശ്രീനിവാസനെ നായകനാക്കി നവാഗതനായ ദിലീപ് മേനോൻ ആണ് ആന അലറലോടലറൽ എന്ന പേരിൽ ഈ ചിത്രം സംവിധാനം ചെയ്യുന്നത്.

ചിത്രത്തിന്റെ പേര് സൂചിപ്പിക്കുന്ന പോലെ ഒരു ആന തന്നെയാണ് വിനീത് ശ്രീനിവാസനൊപ്പം ഈ ചിത്രത്തിൽ കേന്ദ്ര കഥാപാത്രത്തെ അവതരിപ്പിക്കുന്നത്.

ഗ്രാമീണ പശ്ചാത്തലത്തിൽ ആക്ഷേപ ഹാസ്യത്തിന്റെ മേമ്പൊടിയോടെ ഒരുകുന്ന ഈ ചിത്രത്തിന്റെ തിരക്കഥ ഒരുക്കിയിരിക്കുന്നത് ശരത് ബാലൻ ആണ്. ചിത്രീകരണം ആരംഭിച്ച ഈ ചിത്രത്തിൽ വിനീത് ശ്രീനിവാസനൊപ്പം വിജയരാഘവന്‍, സുരാജ് വെഞ്ഞാറമൂട്, മാമൂക്കോയ, ഹാരിഷ് കണാരന്‍, വിശാഖ് നായര്‍ എന്നിവരും അഭിനയിക്കുന്നുണ്ട്.

പോയട്രി ഫിലിം ഹൗസിന്റെ ബാനറിൽ നിർമ്മിക്കുന്ന ഈ ചിത്രത്തിൽ അനു സിത്താരയാണ് നായിക ആയെത്തുന്നത്. ദീപു എസ് ഉണ്ണി കാമറ ചലിപ്പിക്കുന്ന ചിത്രത്തിന് സംഗീതം ഒരുക്കിയിരിക്കുന്നത് ഷാൻ റഹ്മാനും എഡിറ്റിംഗ് നിർവഹിക്കുന്നത് മനോജുമാണ് .

ഗജകേസരിയോഗം, ഗജരാജ മന്ത്രം, പട്ടാഭിഷേകം, ആനച്ചന്തം എന്നിവയൊക്കെ മലയാളികൾക്ക് സുപരിചിതമായ ആന ചിത്രങ്ങൾ ആണ്. അവയുടെ എല്ലാം കൂട്ടത്തിലേക്കു ഇനി മുതൽ ഈ ചിത്രം കൂടി എത്തുകയാണ്. ചിത്രീകരണം പുരോഗമിക്കുന്ന ആന അലറലോടലറൽ ഈ വർഷം തന്നെ പ്രദർശനത്തിന് എത്തുമെന്നാണ് പ്രതീക്ഷിക്കപ്പെടുന്നത്.