ക്രൈം ഡ്രാമയുമായി ഞെട്ടിക്കാൻ ശ്യാം പുഷ്ക്കരൻ; വിനീത് ശ്രീനിവാസൻ- ബിജു മേനോൻ ടീമിന്റെ തങ്കം ഇന്ന് മുതൽ; തീയേറ്റർ ലിസ്റ്റ് ഇതാ

വിനീത് ശ്രീനിവാസൻ, ബിജു മേനോൻ എന്നിവർ നായകന്മാരായി എത്തുന്ന തങ്കം ഇന്ന് മുതൽ കേരളത്തിലെ സിനിമ പ്രേമികളുടെ മുന്നിലെത്തും. സൂപ്പർ ഹിറ്റ് ചിത്രങ്ങളുടെ രചയിതാവ് ശ്യാം പുഷ്ക്കരൻ തിരക്കഥ രചിച്ച ഈ ചിത്രം സംവിധാനം ചെയ്തിരിക്കുന്നത് നവാഗതനായ സഹീദ് അറഫാത് ആണ്. തന്റെ പതിവ് ചിത്രങ്ങളിൽ നിന്നും വ്യത്യസ്തമായി ഒരു ക്രൈം ഡ്രാമയായാണ് ശ്യാം പുഷ്ക്കരൻ ഈ ചിത്രം ഒരുക്കിയിരിക്കുന്നത്. ഇതിന്റെ ടീസർ, ട്രൈലെർ, ഗാനം എന്നിവയൊക്കെ മികച്ച പ്രേക്ഷക ശ്രദ്ധ നേടുകയും അതിലൂടെ അവർക്കു പ്രതീക്ഷ പകരുകയും ചെയ്തിരുന്നു. കേരളത്തിലെ 150 ന് മുകളിൽ സ്‌ക്രീനുകളിലാണ് ഈ ചിത്രം റിലീസ് ചെയ്തിരിക്കുന്നത്. ദിലീഷ് പോത്തൻ, ശ്യാം പുഷ്കരൻ, ഫഹദ് ഫാസിൽ എന്നിവർ നേതൃത്വം നൽകുന്ന ഭാവന സ്റ്റുഡിയോസ് പുത്തൻ ടീമിനൊപ്പം എത്തുന്നു എന്നതും ഈ ചിത്രത്തിന്റെ സവിശേഷതയാണ്.

ഹിന്ദിയിലും മറാത്തിയിലും തിളങ്ങിയിട്ടുള്ള നടനും തിരക്കഥാകൃത്തുമായ ഗിരീഷ് കുൽക്കർണിയും അഭിനയിച്ച ഈ ചിത്രത്തിലെ നായികാ വേഷം ചെയ്തിരിക്കുന്നത് അപർണ്ണ ബാലമുരളിയാണ്. കൊച്ചുപ്രേമൻ, വിനീത് തട്ടിൽ, ശ്രീകാന്ത് മുരളി തുടങ്ങിയവരും പ്രധാന വേഷങ്ങളിൽ അഭിനയിച്ച ഈ ചിത്രത്തിൽ, മലയാളത്തിൽ ഇതുവരെ മുഖം കാണിച്ചിട്ടില്ലാത്ത നിരവധി മറാത്തി, ഹിന്ദി, തമിഴ് അഭിനേതാക്കളും പ്രത്യക്ഷപ്പെടുന്നുണ്ട്. ഗൗതം ശങ്കർ ക്യാമറ ചലിപ്പിച്ചിരിക്കുന്ന ഈ ചിത്രം എഡിറ്റ് ചെയ്തിരിക്കുന്നത് കിരൺ ദാസും, ഇതിനു സംഗീതമൊരുക്കിയത് ബിജിബാലുമാണ്. ആക്ഷനും പ്രാധാന്യം ഉള്ള ഈ ചിത്രത്തിന്റെ സംഘട്ടന സംവിധായകനായി ജോലി ചെയ്തിരിക്കുന്നത് സുപ്രീം സുന്ദറാണ്. കുമ്പളങ്ങി നൈറ്റ്സ്, ജോജി, പാൽതു ജാൻവർ എന്നിവക്ക് ശേഷം ഭാവന സ്റ്റുഡിയോസ് നിർമ്മിച്ച ചിത്രമാണിത്.