മുകുന്ദനുണ്ണി വീണ്ടും വരും; രണ്ടാം ഭാഗം പ്രഖ്യാപിച്ച് വിനീത് ശ്രീനിവാസൻ

ഇപ്പോൾ കേരളത്തിലെ തീയേറ്ററുകളിൽ സൂപ്പർ ഹിറ്റായി ഓടുന്ന ചിത്രമാണ് വിനീത് ശ്രീനിവാസൻ നായകനായി എത്തിയ മുകുന്ദൻ ഉണ്ണി അസോസിയേറ്റ്‌സ്. നവാഗതനായ അഭിനവ് സുന്ദർ നായക് ആദ്യമായി സംവിധാനം ചെയ്ത ഈ ചിത്രം മലയാള സിനിമ പ്രേമികൾ ഇതുവരെ കാണാത്ത തരത്തിലുള്ള ഒരു സിനിമാനുഭവമാണ് സമ്മാനിക്കുന്നത്. മുകുന്ദൻ ഉണ്ണി എന്ന വക്കീൽ കഥാപാത്രമായി എത്തിയ വിനീത് ശ്രീനിവാസന്റെ കരിയർ ബെസ്റ്റ് പ്രകടനമാണ് ഈ ചിത്രത്തിന്റെ ഹൈലൈറ്റുകളിലൊന്ന്. അതോടൊപ്പം ആർഷ, സുരാജ് വെഞ്ഞാറമൂട്, സുധി കോപ്പ എന്നിവരും ഇതിൽ മികച്ച പ്രകടനമാണ് നൽകിയിരിക്കുന്നത്. ഏതായാലും സൂപ്പർ ഹിറ്റായി ഓടുന്ന ഈ ചിത്രത്തിന്റെ വിജയത്തിന്റെ സന്തോഷത്തിനൊപ്പം ഇതിന്റെ രണ്ടാം ഭാഗം കൂടി പ്രഖ്യാപിച്ചിരിക്കുകയാണ് വിനീത് ശ്രീനിവാസൻ. 2024 ഇൽ ഇതിന്റെ രണ്ടാം ഭാഗം പ്രേക്ഷകരുടെ മുന്നിലെത്തുമെന്നും, അതിന്റെ പ്ലാനിങ്ങിലാണ് മുകുന്ദൻ ഉണ്ണി അസ്സോസ്സിയേറ്റ്സിന്റെ ടീമെന്നും വിനീത് ശ്രീനിവാസൻ ഫേസ്ബുക് ലൈവിൽ അറിയിച്ചു.

ഒരു ലീഗൽ കോമഡി എന്നോ കോമഡി ത്രില്ലറെന്നോ വിശേഷിപ്പിക്കാവുന്ന ഈ ചിത്രം രചിച്ചത് സംവിധായകനും വിമൽ ഗോപാലകൃഷ്ണനും ചേർന്നാണ്. ജോയ് മൂവി പ്രൊഡക്ഷൻസിന്റെ ബാനറിൽ ഡോക്ടർ അജിത് ജോയി നിർമ്മിച്ചിരിക്കുന്ന ഈ ചിത്രത്തിൽ ജഗദീഷ്, തൻവിറാം, ജോർജ്ജ് കോര, മണികണ്ഠൻ പട്ടാമ്പി, സുധീഷ്, അൽത്താഫ് സലിം, നോബിൾ ബാബു തോമസ്, ബിജു സോപാനം, റിയാസെറ, വിജയൻ കാരന്തൂർ, രഞ്ജിത്ത് ബാലകൃഷ്ണൻ എന്നിവരും വേഷമിട്ടിരിക്കുന്നു. സിബി മാത്യു അലക്സ് സംഗീത സംവിധാനം നിർവഹിച്ച ഈ ചിത്രത്തിന് ക്യാമറ ചലിപ്പിച്ചത് വിശ്വജിത് ഒടുക്കത്തിലും ഈ ചിത്രം എഡിറ്റ് ചെയ്തിരിക്കുന്നത് നിധിൻരാജ് ആരോളും അഭിനവ് സുന്ദർ നായകും ചേർന്നുമാണ്.