കയ്യടികൾക്ക് നടുവിൽ സ്റ്റേറ്റ് അവാർഡ് വാങ്ങി വിനായകൻ

ആരവങ്ങൾക്ക് നടുവിൽ പുരസ്‌കാരമേറ്റുവാങ്ങി കമ്മട്ടിപ്പാടത്തിലെ ഗംഗ. രാജീവ് രവി സംവിധാനം ചെയ്ത കമ്മട്ടിപ്പാടത്തിലെ മികച്ച അഭിനയം കാഴ്ചവെച്ചതിനാണ് 2016 ലെ കേരള സംസ്ഥാന പുരസ്കാരം വിനായകനെ തേടിയെത്തിയത്.

തലശ്ശേരിയിൽ ഇന്നലെ നടന്ന സംസ്ഥാന ചലച്ചിത്ര പുരസ്‌കാര വിതരണ വേദിയിലാണ് മുഖ്യമന്ത്രി പിണറായി വിജയന്റെ കയ്യിൽ നിന്നും വിനായകൻ മികച്ച നടനുള്ള പുരസ്കാരം ഏറ്റുവാങ്ങിയത്. വമ്പന്‍ കയ്യടികളാണ് വിനായകന് അവാര്‍ഡ് നല്‍കിയപ്പോള്‍ വേദിയില്‍ നിന്നും ഉയര്‍ന്നത്.

കണ്ണൂരിൽ നടന്ന അവാർഡ് ദാന ചടങ്ങിൽ സിനിമാലോകത്തെ പ്രമുഖ താരങ്ങളോ സംവിധായകരോ പങ്കെടുത്തില്ല എന്നത് രൂക്ഷവിമർശനത്തിന് വിധേയമായിരുന്നു. പിണറായി വിജയൻ തന്റെ പ്രസംഗത്തിൽ ഈ വിവരം വിമർശിച്ചിരുന്നു.

ഒപ്പമുള്ള താരത്തെ പിന്തുണക്കണമെന്നും ഇത്തരം വേദികളിൽ താരങ്ങളുടെ സാന്നിദ്യം അനിവാര്യമാണെന്നും മുഖ്യമന്ത്രി പറഞ്ഞു. ജെസി ഡാനിയേൽ പുരസ്‌കാര തുക ഒരു ലക്ഷത്തിൽ നിന്നും 5 ലക്ഷമാക്കി ഉയർത്തിയെന്നും പിണറായി വിജയൻ കൂട്ടിച്ചേർത്തു.

നേരത്തെ കൊച്ചിയില്‍ ആക്രമിക്കപ്പെട്ട യുവ നടിക്ക് പിന്തുണ അറിയിച്ചുകൊണ്ട് സംസ്ഥാന ചലച്ചിത്ര അവാര്‍ഡ് ദാന വേദിക്ക് സമീപം വിമണ്‍ ഇന്‍ സിനിമാ കളക്ടീവ് അംഗങ്ങള്‍ ഒപ്പുശേഖരണം സംഘടിപ്പിച്ചിരുന്നു.