താരസിംഹാസനം തിരിച്ചു പിടിക്കാൻ കോബ്രയുമായി ചിയാൻ വിക്രം; റിലീസ് തീയതി പ്രഖ്യാപിച്ച് താരം

തമിഴകത്തിന്റെ ചിയാൻ വിക്രം നായകനായി എത്തുന്ന ഏറ്റവും പുതിയ ചിത്രമാണ് കോബ്ര. നേരത്തെ ഓഗസ്റ്റ് പന്ത്രണ്ടിന് ഈ ചിത്രം റിലീസ് ചെയ്യുമെന്നാണ് പ്രഖ്യാപിച്ചിരുന്നതെങ്കിലും പോസ്റ്റ് പ്രൊഡക്ഷൻ ജോലികൾ തീരാൻ വൈകിയതിനാൽ ഇതിന്റെ റിലീസ് മാറ്റി വെച്ചിരുന്നു. ഇപ്പോഴിതാ ഈ ചിത്രത്തിന്റെ പുതിയ റിലീസ് ഡേറ്റ് ഔദ്യോഗികമായി തന്നെ പുറത്തു വിട്ടിരിക്കുകയാണ്. വരുന്ന ഓഗസ്റ്റ് മാസം മുപ്പത്തിയൊന്നിനാണ് ഈ ചിത്രം റിലീസ് ചെയ്യുക. ഒരുപിടി വ്യത്യസ്ത ഗെറ്റപ്പുകളിൽ വിക്രമെത്തുന്ന ഈ ചിത്രം, ഇമൈക നൊടികൾ, ഡിമാൻഡി കോളനി എന്നീ സൂപ്പർഹിറ്റ് സിനിമകൾ സംവിധാനം ചെയ്ത ആർ. അജയ് ജ്ഞാനമുത്തുവാണ് സംവിധാനം ചെയ്തിരിക്കുന്നത്. സെവൻ സ്ക്രീൻ സ്റ്റുഡിയോയുടെ ബാനറിൽ എസ്.എസ്. ലളിത് കുമാർ നിർമ്മിച്ചിരിക്കുന്ന ഈ ചിത്രത്തിൽ കെ ജി എഫ് സീരിസിലൂടെ ജനപ്രീതി നേടിയ ശ്രീനിധി ഷെട്ടിയാണ് നായികാ വേഷത്തിൽ എത്തിയിരിക്കുന്നത്.

ഇഫാർ മീഡിയായ്ക്ക് വേണ്ടി റാഫി മാതിര ഈ ചിത്രം കേരളത്തിൽ അവതരിപ്പിക്കുമ്പോൾ, ഡ്രീം ബിഗ് ഫിലിംസും, ഇ ഫോർ എൻറ്റർടൈൻമെൻറ്റും ചേർന്ന് കോബ്ര ഇവിടുത്തെ സ്‌ക്രീനുകളിൽ വിതരണം ചെയ്യും. ഇന്ത്യൻ ക്രിക്കറ്റ് താരം ഇർഫാൻ പത്താൻ ഒരു പ്രധാന വേഷം ചെയ്യുന്ന കോബ്രയിൽ റോഷൻ മാത്യു, സർജാനോ ഖാലിദ്, മിയ, കനിഹ, പദ്മപ്രിയ, മാമുക്കോയ, ബാബു ആൻറ്റണി എന്നീ മലയാള താരങ്ങളും അഭിനയിച്ചിട്ടുണ്ട്. ഹരീഷ് കണ്ണൻ ക്യാമറ ചലിപ്പിച്ച കോബ്ര എഡിറ്റ് ചെയ്തിരിക്കുന്നത് ഭുവൻ ശ്രീനിവാസനാണ്. സംഗീത മാന്ത്രികൻ എ ആർ റഹ്മാൻ ഈണം നൽകിയ ഇതിലെ ഗാനങ്ങളെല്ലാം തന്നെ ഇതിനോടകം സൂപ്പർ ഹിറ്റുകളാണ്.