മികച്ച സിനിമ ആയിട്ടും വിതരണക്കാരെ കിട്ടാതെ റിലീസിനായി കാത്തിരുന്ന 3 വർഷങ്ങൾ; ജീവിതത്തിൽ ഏറ്റവും കൂടുതൽ ബുദ്ധിമുട്ടിയത് അപ്പോൾ

തമിഴകത്തിന്റെ സൂപ്പർ താരങ്ങളിൽ ഒരാളായ ചിയാൻ വിക്രം മലയാളികളുടേയും പ്രീയപ്പെട്ട നടന്മാരിൽ ഒരാളാണ്. കേരളത്തിന്റെ മരുമകൻ കൂടിയായ വിക്രം തന്റെ തുടക്കത്തിൽ നായകനായും സഹനടനായും ഒരുപിടി മലയാള ചിത്രങ്ങളിൽ അഭിനയിച്ചിട്ടുമുണ്ട്. അതിനു ശേഷമാണു വിക്രം തമിഴിൽ ശ്രദ്ധേയ വേഷങ്ങൾ ചെയ്തു തുടങ്ങിയതും പിന്നീട് ദേശീയ പുരസ്‍കാരം ഉൾപ്പെടെ നേടി തമിഴിലെ സൂപ്പർ താരമായി മാറിയതും. സിനിമയോടുള്ള ഈ നടന്റെ പാഷനും സിനിമയ്ക്കു വേണ്ടി, കഥാപാത്രങ്ങളുടെ പൂർണ്ണതക്കു വേണ്ടി എടുക്കുന്ന പരിശ്രമങ്ങളും വളരെ വലുതാണ്. ആ കഠിനമായ അധ്വാനമാണ് വിക്രമിനെ ഇന്നത്തെ നിലയിൽ എത്തിച്ചത്. ഒരിക്കൽ ഒരപകടം പറ്റി നടക്കാൻ കഴിയാതെ കട്ടിലിൽ മാത്രം ഒതുങ്ങി പോയിരുന്നു വിക്രം. അവിടെ നിന്ന് വീണ്ടും സ്വന്തം കാലിൽ നിന്ന് സിനിമയിലെത്തി വിജയം വരിച്ച അപാരമായ ഇച്ഛാ ശ്കതിയുടെ കഥ കൂടി പറയാനുണ്ട് വിക്രമിന്. ഒട്ടേറെ പ്രതിസന്ധികളെ അതിജീവിച്ചു ഇവിടം വരെയെത്തിയ വിക്രം ജീവിതത്തിൽ ഏറ്റവും കൂടുതൽ ബുദ്ധിമുട്ടിയ സമയം ഏതാണെന്നു വെളിപ്പെടുത്തുകയാണ്. പ്രശസ്ത മാധ്യമ പ്രവത്തകനായ ശ്രീകണ്ഠൻ നായർക്ക് നൽകിയ അഭിമുഖത്തിലാണ് വിക്രം അത് തുറന്നു പറയുന്നത്.

ജീവിതത്തിൽ ഏറ്റവും കൂടുതൽ ബുദ്ധിമുട്ടും നിരാശയും പ്രതിസന്ധിയും അനുഭവപ്പെട്ട സമയം ഏതായിരുന്നു എന്നായിരുന്നു ശ്രീകണ്ഠൻ നായരുടെ ചോദ്യം. അപകടം പറ്റി കിടന്ന സമയത്താണോ അത് തോന്നിയത് എന്നും അദ്ദേഹം ചോദിച്ചു. എന്നാൽ, ആ സമയത്തു വലിയ ബുദ്ധിമുട്ടു തോന്നിയിരുന്നു എങ്കിലും ജീവിതത്തിലെ ഏറ്റവും വലിയ വിഷമവും നിരാശയുമൊക്കെ തോന്നിയത് സേതു എന്ന ചിത്രം റിലീസ് ചെയ്യാൻ വൈകിയപ്പോൾ ആണെന്ന് വിക്രം പറയുന്നു. വിക്രമിന്റെ കരിയറിൽ വഴിത്തിരിവായ ചിത്രമാണ് സേതു. എന്നാൽ സിനിമ പൂർത്തിയായി മൂന്നു വർഷത്തോളം കഴിഞ്ഞാണ് അത് തീയേറ്ററുകളിൽ എത്തിയത്. മികച്ച ചിത്രമായിരുന്നിട്ടു കൂടി സേതുവിന്‌ വിതരണക്കാരെ ലഭിച്ചില്ല. തമിഴിലെ വലിയ വലയ വിതരണക്കാരും മറ്റു പ്രവർത്തകരുമൊക്കെ വന്നു സിനിമ കാണുകയും, ഒരുപാട് അഭിനന്ദിക്കുകയും ചെയ്യും. സംവിധായകനും തനിക്കും അവാർഡുകൾ ലഭിക്കുമെന്നും ഗംഭീര ചിത്രമാണെന്ന് പറയുകയും ചെയ്യും. പക്ഷെ ചിത്രം വിതരണം ചെയ്യാൻ മാത്രം ആരും തയ്യാറായില്ല. ആ കാലഘട്ടത്തിൽ താൻ വിഷമിച്ച പോലെ ജീവിതത്തിൽ വേറെയൊരു ഘട്ടത്തലും വിഷമിച്ചിട്ടില്ല എന്നാണ് വിക്രം വെളിപ്പെടുത്തുന്നത്.