ഗോട്ടിൽ ട്രിപ്പിൾ റോളിൽ ദളപതി വിജയ്?; ആകാംഷയോടെ ആരാധകർ

ദളപതി വിജയ് നായകനായി എത്തുന്ന ഏറ്റവും പുതിയ ചിത്രമാണ് സൂപ്പർ ഹിറ്റ് സംവിധായകൻ വെങ്കട് പ്രഭു സംവിധാനം ചെയ്യുന്ന ഗ്രെയ്റ്റസ്റ്റ് ഓഫ് ഓൾ ടൈം അഥവാ ഗോട്ട്. അച്ഛനും മകനുമായി വിജയ് ഇരട്ട വേഷത്തിലാണ് ഈ ചിത്രത്തിലെത്തുന്നതെന്ന വാർത്തകൾ നേരത്തെ തന്നെ പുറത്തു വരികയും, അത് കാണിക്കുന്ന പോസ്റ്ററുകൾ വരെ റിലീസ് ചെയ്യുകയും ചെയ്തിരുന്നു. എന്നാലിപ്പോഴിതാ പ്രശസ്ത തമിഴ് സിനിമാ സംവാദ പ്ലാറ്റ്‌ഫോമായ വളൈ പേച്ചിൽ നിന്ന് പുറത്തു വരുന്ന വിവരങ്ങൾ അനുസരിച്ച്, ഈ ചിത്രത്തിൽ ദളപതി വിജയ്‌യെ മൂന്നു വേഷങ്ങളിൽ കാണാൻ സാധിക്കും. ഇതിനു മുൻപ് വിജയ് ട്രിപ്പിൾ റോൾ അവതരിപ്പിച്ചത് ആറ്റ്ലി സംവിധാനം ചെയ്ത മെർസൽ എന്ന ചിത്രത്തിലാണ്. എ ജി എസ് എന്റർടൈൻമെന്റ് നിർമ്മിക്കുന്ന ഗോട്ടിൽ വമ്പൻ താരനിരയാണ് അണിനിരക്കുന്നത്.

സയൻസ് ഫിക്ഷൻ എന്റർടെയ്നർ ആയി ഒരുക്കുന്ന ഈ ചിത്രത്തിന്റെഅവസാന ഘട്ട ചിത്രീകരണമാണ് ഇപ്പോൾ നടക്കുന്നത്. മീനാക്ഷി ചൗധരി, സ്‌നേഹ, ലൈല, ജയറാം, പാർവതി നായർ, പ്രേംജി, വൈഭവ്, പ്രശാന്ത്, അജ്മൽ അമീർ, പ്രഭുദേവ, മോഹൻ, യോഗി ബാബു, വിടിവി ഗണേഷ്, അരവിന്ദ് ആകാശ് എന്നിവർ ഈ ചിത്രത്തിന്റെ താരനിരയിലുണ്ട്. സെപ്റ്റംബർ അഞ്ചിനാണ് ഗോട്ട് ആഗോള റിലീസായി പ്രേക്ഷകരുടെ മുന്നിലെത്തുക. സംവിധായകൻ വെങ്കട് പ്രഭുവിനൊപ്പം കെ ചന്ദ്രുവും ഏഴിലരശ് ഗുണശേഖരനും ചേർന്ന് തിരക്കഥ രചിച്ച ഈ ചിത്രത്തിന് കാമറ ചലിപ്പിക്കുന്നത് സിദ്ധാർത്ഥ നൂനിയും സംഗീതമൊരുക്കുന്നത് യുവാൻ ശങ്കർ രാജയുമാണ്. വെങ്കട് രാജനാണ് ഈ ചിത്രത്തിന്റെ എഡിറ്റർ. ഈ ചിത്രത്തിലെ രണ്ട് ഗാനങ്ങൾ ഇതിനോടകം പുറത്തു വരികയും മികച്ച പ്രേക്ഷക ശ്രദ്ധ നേടുകയും ചെയ്തിരുന്നു.