വിജയും വെട്രിമാരനും ഒന്നിക്കുന്ന മാസ്സ് ചിത്രത്തിനായി കാത്തിരിക്കുന്നു എന്ന്

തമിഴ് സിനിമക്ക് ദേശീയ- അന്തർദേശീയ ബഹുമതികൾ നേടിക്കൊടുത്ത സംവിധായകരിൽ ഒരാൾ ആണ് വെട്രിമാരൻ. തന്റെ ഓരോ ചിത്രവും ഒന്നിനൊന്നു വ്യത്യസ്തമായ രീതിയിൽ ചെയ്യുന്ന ഈ സംവിധായകൻ തിരഞ്ഞെടുക്കുന്ന പ്രമേയങ്ങളും ഗംഭീരമാണ്. തന്റെ അഭിനേതാക്കളിൽ നിന്നു അവരുടെ ബെസ്റ്റ് പെർഫോമൻസ് പുറത്തെടുക്കാനുള്ള കഴിവും ഈ പ്രതിഭയെ വേറിട്ടു നിർത്തുന്നു. അദ്ദേഹത്തിന്റെ കഴിഞ്ഞ ചിത്രമായ അസുരനും ബ്ലോക്ക്ബസ്റ്റർ വിജയം ആണ് നേടിയത്‌. ധനുഷ്- മഞ്ജു വാര്യർ ടീമിന്റെ അതിഗംഭീര പ്രകടനം ആണ് ഈ ചിത്രത്തിന്റെ ഹൈലൈറ്റ്. ഇപ്പോൾ വരുന്ന റിപ്പോർട്ടുകൾ പ്രകാരം തമിഴകത്തെ ഏറ്റവും വലിയ താരമായ ദളപതി വിജയ്യോടൊപ്പം ഒരു ചിത്രം ചെയ്യാൻ ഉള്ള തയ്യാറെടുപ്പിലാണ് വെട്രിമാരൻ.

ഇപ്പോൾ തന്റെ 64 മത് ചിത്രമായി ലോകേഷ് കനകരാജ് ഒരുക്കുന്ന പുതിയ ചിത്രത്തിൽ അഭിനയിക്കുന്ന വിജയ് അടുത്തതായി ചെയ്യാൻ പോകുന്ന ചിത്രങ്ങളെ കുറിച്ച് ഒട്ടേറെ അഭ്യൂഹങ്ങൾ സോഷ്യൽ മീഡിയയിൽ പ്രചരിക്കുന്നുണ്ട്. മഗിഴ് തിരുമേനി, മോഹൻ രാജ, ആറ്റ്‌ലി എന്നിവരുടെ പേരുകൾ ആണ് അടുത്ത വിജയ് ചിത്രത്തിന്റെ സംവിധായകൻ എന്ന പേരിൽ ഇത്രയും നാൾ പ്രചരിച്ചത് എങ്കിൽ ഇപ്പോൾ പ്രചരിക്കുന്നത് വെട്രിമാരന്റെ പേരാണ്. അദ്ദേഹം വിജയ്‌യുമായി ഒരു തിരക്കഥ ചർച്ച ചെയ്തു കഴിഞ്ഞു എന്നാണ് റിപ്പോർട്ടുകൾ പറയുന്നത്. ഈ ചിത്രം സംഭവിച്ചാൽ ഈ കൂട്ടുക്കെട്ടിൽ ഒരുങ്ങുന്ന ആദ്യ ചിത്രം ആവും അത്. വെട്രിമാരനും വിജയും ഒന്നിക്കുന്നത് ഒരു മാസ്സ് ചിത്രത്തിന് വേണ്ടി ആവും എന്നും സൂചനകൾ പറയുന്നു. ഈ ചിത്രം സംഭവിക്കണം എന്ന ആഗ്രഹത്തിൽ ആണ് ദളപതി ആരാധകർ. എല്ലാം നന്നായി വന്നാൽ വിജയ്- വെട്രിമാരൻ ചിത്രത്തിന്റെ ഒഫീഷ്യൽ അന്നൗന്സമെന്റ് വൈകാതെ ഉണ്ടാകും എന്നാണ് ആരാധകർ പ്രതീക്ഷിക്കുന്നത്.