വിജയ് സൂപ്പറും പൗർണ്ണമിയും പുതിയ പോസ്റ്റർ എത്തി; സൂപ്പർ കൂളായി ആസിഫ് അലിയും ഐശ്വര്യ ലക്ഷ്മിയും.

മലയാള സിനിമയുടെ പുതിയ തലമുറയിലെ സൂപ്പർ ഹിറ്റ് സംവിധായകനായ ജിസ് ജോയി ഒരുക്കിയ മൂന്നാമത്തെ ചിത്രമാണ് വിജയ് സൂപ്പറും പൗർണ്ണമിയും. അധികം വൈകാതെ തന്നെ തീയേറ്ററുകളിൽ എത്താൻ തയ്യാറെടുക്കുന്ന ഈ ചിത്രം ഏറെ പ്രതീക്ഷയോടെയാണ് മലയാള സിനിമാ പ്രേമികൾ കാത്തിരിക്കുന്നത്. രണ്ടു സൂപ്പർ ഹിറ്റുകൾക്കു ശേഷം മൂന്നാമതും ജിസ് ജോയ് എത്തുന്നത് ആസിഫ് അലിക്കൊപ്പം തന്നെയാണ് എന്നതാണ് ഈ ചിത്രത്തിന്റെ ആദ്യത്തെ ഹൈലൈറ്റ്. തുടർച്ചയായ നാലാം വിജയം തേടി മലയാളത്തിന്റെ ഭാഗ്യ നായികയായ ഐശ്വര്യ ലക്ഷ്മിയാണ് ഈ ചിത്രത്തിലെ നായികാ വേഷം ചെയ്യുന്നത്. ആസിഫ് അലിയും ഐശ്വര്യ ലക്ഷ്മിയും സൂപ്പർ കൂൾ ലുക്കിൽ പ്രത്യക്ഷപ്പെട്ടിരിക്കുന്ന ഈ ചിത്രത്തിന്റെ പുതിയ പോസ്റ്റർ ഇപ്പോൾ റിലീസ് ചെയ്തു. സോഷ്യൽ മീഡിയ പ്ലാറ്റുഫോമുകളിൽ ഗംഭീര സ്വീകരണമാണ് ഈ പോസ്റ്ററിന് ഇപ്പോൾ ലഭിക്കുന്നത്.

ന്യൂ സൂര്യ ഫിലിമ്സിന്റെ ബാനറിൽ സുനിൽ എ കെ ആണ് ഈ ചിത്രം നിർമ്മിച്ചിരിക്കുന്നത്. പ്രിൻസ് ജോർജ് സംഗീത സംവിധാനം നിർവഹിക്കുന്ന ഈ ചിത്രത്തിന് ദൃശ്യങ്ങൾ ഒരുക്കുന്നത് റെനഡിവേ ആണ്. കഴിഞ്ഞ വർഷം നൂറു ദിവസം തിയേറ്ററിൽ പ്രദർശിപ്പിച്ചു വമ്പൻ വിജയം നേടിയെടുത്ത ചിത്രമായിരുന്നു ആസിഫ് അലി- ജിസ് ജോയ് ടീമിന്റെ സൺ‌ഡേ ഹോളിഡേയ് എന്നത് കൊണ്ട് തന്നെ ഈ കൂട്ടുകെട്ട് ആ മികവ് തുടരും എന്ന് തന്നെയാണ് പ്രേക്ഷകരുടെ പ്രതീക്ഷ. ഇവർക്ക് രണ്ടുപേർക്കുമൊപ്പം ബാലു വർഗീസ്, ജോസഫ് അന്നംക്കുട്ടി , രഞ്ജി പണിക്കർ, സിദ്ദിഖ് , അജു വർഗീസ്, അലെൻസിയർ, തുടങ്ങി ഒരു വലിയ താര നിര തന്നെ ഈ ചിത്രത്തിൽ അണിനിരക്കുന്നുണ്ട്. ടീം ഫോർ മ്യൂസിക്സ് ആണ് ഈ ചിത്രത്തിന്റെ പശ്ചാത്തല സംഗീതം ഒരുക്കിയിരിക്കുന്നത്.