ദളപതിക്കു എതിരെ കൊമ്പു കോർക്കാൻ മക്കൾ സെൽവൻ; വമ്പൻ താര നിരയുമായി ദളപതി 64 ..!

ദളപതി വിജയ് നായകനായി എത്തുന്ന ആറ്റ്ലി ചിത്രമായ ബിഗിൽ അടുത്ത മാസം അവസാനം ദീപാവലി റിലീസ് ആയി എത്താൻ പോവുകയാണ്. ആ ചിത്രത്തിനായി ഏറെ ആവേശത്തോടെ കാത്തിരിക്കുന്ന വിജയ് ആരാധകർക്കും സിനിമാ പ്രേമികൾക്കും അതിലും ആവേശം പകരുന്ന വാർത്തയാണ് ഇപ്പോൾ ലഭിക്കുന്നത്. ദളപതി വിജയ്‌യുടെ അടുത്ത ചിത്രത്തെ കുറിച്ചാണ് ആ വാർത്ത. മാനഗരം, കൈതി എന്നീ ചിത്രങ്ങൾ സംവിധാനം ചെയ്ത ലോകേഷ് കനഗരാജ് ആണ് പുതിയ വിജയ് ചിത്രം എഴുതി സംവിധാനം ചെയ്യുന്നത്. ഈ ചിത്രത്തിൽ ദളപതി വിജയ്ക്ക് എതിരെ വില്ലൻ വേഷത്തിൽ എത്താൻ പോകുന്നത് മക്കൾ സെൽവൻ വിജയ് സേതുപതി ആണ്. ആദ്യമായാണ് വിജയും വിജയ് സേതുപതിയും ഒന്നിച്ചു അഭിനയിക്കാൻ പോകുന്നത്. ഒരു ഗ്യാങ്സ്റ്റർ ത്രില്ലർ ആയാവും ഈ ചിത്രം ഒരുങ്ങുക എന്നും സാധാരണ വിജയ് ചിത്രങ്ങളിൽ നിന്ന് ഏറെ വേറിട്ട് നിൽക്കുന്ന ഒരു ചിത്രമാകും ഇതെന്നുമാണ് സൂചനകൾ ലഭിക്കുന്നത്.

സേവ്യർ ബ്രിട്ടോ നിർമ്മിക്കുന്ന ഈ ബിഗ് ബജറ്റ് ചിത്രത്തിന്റെ ഷൂട്ടിംഗ് ഒക്ടോബർ മാസത്തിൽ ആരംഭിക്കും. മാളവിക മോഹനൻ ആണ് ഈ ചിത്രത്തിൽ വിജയുടെ നായികാ വേഷത്തിൽ എത്തുക എന്നാണ് റിപ്പോർട്ടുകൾ പറയുന്നത്. സത്യൻ സൂര്യൻ ക്യാമറ ചലിപ്പിക്കുന്ന ഈ ചിത്രത്തിന് വേണ്ടി എഡിറ്റിംഗ് നിർവഹിക്കുക ഫിനോമിന് രാജ് ആണ്. സ്റ്റണ്ട് സിൽവ ആയിരിക്കും ഇതിന്റെ ആക്ഷൻ കൊറിയോഗ്രാഫി ചെയ്യുക. ലോകേഷ് കനകരാജിന്റെ കൈതി എന്ന കാർത്തി ചിത്രവും ബിജിലിന് ഒപ്പം ദീപാവലിക്ക് റിലീസ് ചെയ്യും.