മണി രത്‌നത്തിന്റെ പുതിയ ചിത്രത്തിൽ ഫഹദ് ഫാസിലിനും വിജയ് സേതുപതിക്കും ഒപ്പം തമിഴിലെ ജനപ്രിയ താരങ്ങളും …

കഴിഞ്ഞ കുറെ മാസങ്ങൾ ആയി മണി രത്‌നത്തിന്റെ അടുത്ത ചിത്രത്തിന്റെ താര നിറയെ കുറിച്ച് ഊഹാപോഹങ്ങൾ പരക്കുകയായിരുന്നു സോഷ്യൽ മീഡിയയിൽ. ഇപ്പോളിതാ എല്ലാ ഊഹാപോഹങ്ങൾക്കും അവസാനം ഇട്ടു കൊണ്ടി ഒഫീഷ്യൽ ആയി തന്നെ ചിത്രത്തിന്റെ അണിയറ പ്രവർത്തകർ ഈ ചിത്രത്തിന്റെ താര നിരയുടെ വിവരങ്ങൾ പുറത്തു വിട്ടിരിക്കുകയാണ്. ഒരു ഗംഭീര താര നിര തന്നെയാണ് മണി രത്‌നം ഈ ചിത്രത്തിനായി ഒരുക്കിയിരിക്കുന്നത്. അരവിന്ദ് സ്വാമി, ചിമ്പു, ഫഹദ് ഫാസിൽ, വിജയ് സേതുപതി, ജ്യോതിക, ഐശ്വര്യ രാജേഷ് എന്നിവരാണ് ഈ ചിത്രത്തിലെ പ്രധാന വേഷങ്ങൾ അവതരിപ്പിക്കുക. ഒരുപക്ഷെ ഈ അടുത്ത കാലത്തു ഒരു ദക്ഷിണേന്ത്യൻ ചിത്രത്തിൽ കാണാൻ പോകുന്ന ഏറ്റവും വലിയ താര നിര എന്ന് തന്നെ ഈ ചിത്രത്തിന്റെ താര നിരയെ വിശേഷിപ്പിക്കാം.

പ്രതീക്ഷിച്ചിരുന്നത് പോലെ തന്നെ എ ആർ റഹ്മാൻ ആയിരിക്കും ഈ മണി രത്‌നം ചിത്രത്തിന്റെയും സംഗീത സംവിധായകൻ. വർഷങ്ങൾക്കു ശേഷം സന്തോഷ് ശിവൻ മണി രത്‌നം ചിത്രത്തിന് വേണ്ടി കാമറ ചലിപ്പിക്കുന്നു എന്ന പ്രത്യേകതയും ഈ ചിത്രത്തിന് ഉണ്ടാകും.

ശ്രീകർ പ്രസാദ് ആയിരിക്കും ഈ മണി രത്‌നം ചിത്രത്തിന്റെയും എഡിറ്റർ ആയി ജോലി ചെയ്യുക. ബിഗ് ബഡ്ജറ്റിൽ നിർമ്മിക്കുന്ന ഈ ചിത്രം നിർമ്മിക്കുന്നതും മണി രത്‌നം തന്നെ ആയിരിക്കും. മദ്രാസ് ടാകീസ് എന്ന സ്വന്തം ബാനറിൽ ആണ് അദ്ദേഹം ഈ ചിത്രം നിർമ്മിക്കുക.

അടുത്ത വർഷം ജനുവരിയോടെ ചിത്രീകരണം ആരംഭിക്കാൻ ഉദ്ദേശിക്കുന്ന ഈ ചിത്രം മണി രത്‌നത്തിന്റെ കരിയറിൽ ഏറെ നിർണ്ണായകമായേക്കാവുന്ന ഒരു ചിത്രമാണ്. കാരണം കുറച്ചു വർഷങ്ങൾ ആയി വലിയ വിജയങ്ങൾ ഒന്നും അദ്ദേഹത്തെ തേടി എത്തുന്നില്ല.

ഒരു ത്രില്ലർ ആയിരിക്കും ഈ ചിത്രം എന്ന് ഐശ്വര്യ രാജേഷ് അടുത്തിടെ ഒരു മാധ്യമത്തോട് പറഞ്ഞത് ഒഴിച്ചാൽ ഈ ചിത്രം ഏതു തരത്തിൽ ഉള്ളതാവും എന്നതിനെ കുറിച്ച് ഇത് വരെ ഔദ്യോഗിക സ്ഥിതീകരണം വന്നിട്ടില്ല.

മണി രത്‌നത്തിന്റെ കഴിഞ്ഞ ചിത്രമായ കാട്രു വെള്ളിയിടായ് ബോക്സ് ഓഫീസിൽ കനത്ത പരാജയം ആയിരുന്നു. കാർത്തി ആയിരുന്നു വമ്പൻ പ്രതീക്ഷകളോടെ എത്തിയ ഈ ചിത്രത്തിലെ നായകൻ.