വാക്കുകൾക്ക് അതീതം എന്ന് ജോജു ജോർജ്; ചോലയുടെ തമിഴ് പതിപ്പിന്റെ പോസ്റ്റർ ഷെയർ ചെയ്തു വെട്രിമാരൻ

പ്രശസ്ത താരം ജോജു ജോർജ് നായകനായി എത്തിയ ചോല എന്ന ചിത്രം ഈ കഴിഞ്ഞ വെള്ളിയാഴ്ച ആണ് കേരളത്തിലെ തീയേറ്ററുകളിൽ എത്തിയത്. സനൽ കുമാർ ശശിധരൻ സംവിധാനം ചെയ്ത ഈ ചിത്രത്തിന് ഗംഭീര പ്രേക്ഷക പ്രതികരണം ആണ് ലഭിക്കുന്നത്. കേരളാ സംസ്ഥാന ചലച്ചിത്ര അവാർഡും അതുപോലെ ഒട്ടേറെ ലോക പ്രശസ്ത അന്തരാഷ്ട്ര ചലച്ചിത്ര മേളകളിൽ നിന്ന് കിട്ടിയ പ്രശംസയുമെല്ലാം ഈ ചിത്രത്തിൽ വലിയ പ്രതീക്ഷ വെച്ച് പുലർത്താൻ പ്രേക്ഷകരെ പ്രേരിപ്പിച്ചിരുന്നു. അങ്ങനെ എല്ലാവരെയും ഏറെ തൃപ്‌തരാക്കുന്ന ഒരു ഗംഭീര സിനിമാനുഭവം ആണ് ചോല എന്നാണ് സാധാരണ പ്രേക്ഷകരും നിരൂപകരും ഒരുപോലെ അഭിപ്രായപ്പെടുന്നത്.

ഇപ്പോഴിതാ ചോലയുടെ തമിഴ് പതിപ്പ് റിലീസിന് തയ്യാറെടുക്കുകയാണ്. അല്ലി എന്നാണ് ഇതിന്റെ തമിഴ് പതിപ്പിന്റെ പേര്. ഇതിന്റെ മലയാളം പതിപ്പ് നിർമ്മിച്ചത് നായകൻ ജോജു ജോർജ് തന്നെയാണെങ്കിൽ അല്ലി എന്ന ഇതിന്റെ തമിഴ് പതിപ്പ് നിർമ്മിച്ചിരിക്കുന്നത് പ്രശസ്ത തമിഴ് സംവിധായകൻ കാർത്തിക് സുബ്ബരാജ് നേതൃത്വം നൽകുന്ന സ്റ്റോൺ ബെഞ്ച് എന്ന ബാനർ ആണ്. ഒരു ത്രില്ലർ ആയി ഒരുക്കിയിരിക്കുന്ന ഈ ചിത്രത്തിന്റെ തമിഴ് പോസ്റ്റർ ഷെയർ ചെയ്തിരിക്കുന്നത് ദേശീയ അവാർഡ് ജേതാവ് കൂടിയായ പ്രശസ്ത സംവിധായകൻ വെട്രിമാരൻ ആണ്.

അദ്ദേഹം താൻ അഭിനയിച്ച ചിത്രത്തിന്റെ പോസ്റ്റർ ഷെയർ ചെയ്തിരിക്കുന്ന അനുഭവത്തെ വാക്കുകൾ കൊണ്ട് വിശേഷിപ്പിക്കാൻ ആവില്ല എന്നാണ് ജോജു പറയുന്നത്. നിമിഷാ സജയൻ നായികാ വേഷത്തിൽ എത്തിയിരിക്കുന്ന ഈ ചിത്രത്തിൽ പുതുമുഖം അഖിൽ വിശ്വനാഥും നിർണ്ണായക കഥാപാത്രമായി എത്തുന്നു. നിമിഷ, ജോജു എന്നിവരുടെ അതിഗംഭീര പ്രകടനമാണ് ഈ ചിത്രത്തിന്റെ ഹൈലൈറ്റ്. ഈ ചിത്രം തമിഴിൽ നിർമ്മിച്ച കാർത്തിക് സുബ്ബരാജിന്റെ പുതിയ തമിഴ് ചിത്രത്തിലും ജോജു അഭിനയിക്കുന്നുണ്ട്.