മികച്ച ബോക്സ് ഓഫീസ് പ്രകടനവുമായി വർണ്യത്തിൽ ആശങ്ക…

മികച്ച പ്രേക്ഷകാഭിപ്രായവും അതുപോലെ തന്നെ മികച്ച ബോക്സ് ഓഫീസ് പ്രകടനവുമായി മുന്നേറുകയാണ് കുഞ്ചാക്കോ ബോബൻ നായകനായ വർണ്യത്തിൽ ആശങ്ക എന്ന ചിത്രം. നടനും സംവിധായകനുമായ സിദ്ധാർഥ് ഭരതൻ സംവിധാനം ചെയ്ത ഈ ആക്ഷേപഹാസ്യ ചിത്രത്തിന് തിരക്കഥ രചിച്ചിരിക്കുന്നത് തൃശൂർ ഗോപാല്ജി ആണ്. മലയാള സിനിമയിൽ ഇന്നേ വരെ വന്നിട്ടുള്ളതിൽ വെച്ച് ഏറ്റവും മികച്ച ആക്ഷേപ ഹാസ്യ ചിത്രങ്ങളിൽ ഒന്നാണ് വർണ്യത്തിൽ ആശങ്ക എന്നാണ് പ്രേക്ഷകാഭിപ്രായം . അതുപോലെ തന്നെ അഭിനേതാക്കളുടെ മികച്ച പ്രകടനം കൊണ്ടും ചിത്രം ശ്രദ്ധ നേടുന്നുണ്ട്.

കുഞ്ചാക്കോ ബോബൻ ക്വോട്ട ശിവൻ എന്ന കഥാപാത്രമായി മികച്ച പ്രകടനം കാഴ്ച വെച്ചപ്പോൾ സുരാജ് വെഞ്ഞാറമ്മൂടും ഒരിക്കൽ കൂടി വിസ്മയിപ്പിച്ചു. ദയാനന്ദൻ എന്ന കഥാപാത്രത്തെയാണ് സുരാജ് ഈ ചിത്രത്തിൽ അവതരിപ്പിച്ചത്.

ഇപ്പോൾ ലഭിക്കുന്ന വിവരങ്ങൾ പ്രകാരം റിലീസ് ചെയ്ത ആദ്യ ആഴ്ചയിൽ ഈ ചിത്രം കേരളത്തിൽ നിന്ന് നേടിയ ഗ്രോസ് കളക്ഷൻ നാല് കോടി രൂപയ്ക്കു മുകളിൽ ആണ്. വളരെ ചെറിയ ബഡ്ജറ്റിൽ ഒരുങ്ങിയ ഈ ചിത്രം ഇതിനോടകം തന്നെ ലാഭത്തിലേക്കു എത്തി കഴിഞ്ഞു എന്നാണ് വാർത്തകൾ പറയുന്നത്.

ഇപ്പോഴും തീയേറ്ററുകളിൽ ചിത്രത്തിന് അനുഭവപ്പെടുന്ന തിരക്ക് കൂടുതൽ വലിയ വിജയത്തിലേക്കാണ് ചിത്രത്തെ നയിക്കുന്നത്. ജനങ്ങൾ മനസ്സറിഞ്ഞു നൽകുന്ന മികച്ച അഭിപ്രായമാണ് ഈ ചിത്രത്തിന്റെ വലിയ വിജയത്തിന് കാരണം.

ചെമ്പൻ വിനോദ്, ഷൈൻ ടോം ചാക്കോ, മണികണ്ഠൻ ആചാരി, രചന നാരായണൻ കുട്ടി, സുനിൽ സുഗത, ജയരാജ് വാര്യർ , ടിനി ടോം, കെ പി എ സി ലളിത, ഗായത്രി സുരേഷ് എന്നിവരും ഈ ചിത്രത്തിന്റെ താര നിരയുടെ ഭാഗമാണ്. ആഷിക് ഉസ്മാൻ പ്രൊഡക്ഷൻസിന്റെ ബാനറിൽ ആഷിക് ഉസ്മാൻ നിർമ്മിച്ചിരിക്കുന്ന ഈ ചിത്രത്തിന് സംഗീതം നൽകിയിരിക്കുന്നത് പ്രശാന്ത് പിള്ളൈ ആണ്.