കുട്ടി സ്റ്റോറിക്ക് ശേഷം ആരാധകരെ ആവേശത്തിലാഴ്ത്താൻ ദളപതിയുടെ മാസ്റ്ററിലെ പുതിയ ഗാനമെത്തുന്നു

ദളപതി വിജയ് നായകനായ പുതിയ ചിത്രമായ മാസ്റ്റർ ഇപ്പോഴതിന്റെ പോസ്റ്- പ്രൊഡക്ഷൻ സ്റ്റേജിലാണ്. കൈദി എന്ന ബ്ലോക്ക്ബസ്റ്റർ കാർത്തി ചിത്രം കഴിഞ്ഞ ദീപാവലിക്ക് നമ്മുക്ക് സമ്മാനിച്ച ലോകേഷ് കനകരാജ് ഒരുക്കുന്ന മാസ്റ്റർ അടുത്ത മാസമാണ് റിലീസ് പ്രഖ്യാപിച്ചിരിക്കുന്നത്. സംവിധായകനും രത്‌നകുമാറും ചേർന്നു രചന നിർവഹിച്ചിരിക്കുന്ന ഈ ചിത്രത്തിൽ ദളപതി വിജയ്ക്ക് ഒപ്പം മക്കൾ സെൽവൻ വിജയ് സേതുപതിയും പ്രധാന വേഷം ചെയ്യുന്നുണ്ട്. എക്സ് ബി ക്രിയേറ്റേഴ്സ് എന്ന ബാനറിൽ സേവ്യർ ബ്രിട്ടോ നിർമ്മിച്ചിരിക്കുന്ന ഈ ചിത്രത്തിന്റെ ഇതുവരെ വന്ന പോസ്റ്ററുകൾ എല്ലാം തന്നെ സൂപ്പർ ഹിറ്റാണ്. മാത്രമല്ല ഇതിലെ ഒരു ഗാനത്തിന്റെ ലിറിക് വീഡിയോയും റിലീസ് ചെയ്തിരുന്നു. ലെറ്റ് മി സിങ് എ കുട്ടി സ്റ്റോറി എന്ന വരികളോടെ തുടങ്ങുന്ന ആ ഗാനമാലപിച്ചതു ദളപതി വിജയ് തന്നെയാണ്. ലോകം മുഴുവൻ തരംഗമായി മാറിയ ആ ഗാനത്തിന് ശേഷം മാസ്റ്ററിലെ പുതിയ ഗാനം നാളെ 5 നു അണിയറ പ്രവർത്തകർ പുറത്തു വിടുന്നു.

അനിരുദ്ധ് രവിചന്ദറാണ് ഈ ചിത്രത്തിന് വേണ്ടി സംഗീതം പകർന്നിരിക്കുന്നത്. ശന്തനു ഭാഗ്യരാജ്, മാളവിക മോഹനൻ, ഗൗരി കിഷൻ, അർജുൻ ദാസ്, ആൻഡ്രിയ, ശ്രീമാൻ, പ്രേം, സഞ്ജീവ്, ശ്രീനാഥ്, രമ്യ സുബ്രമണ്യൻ, രമേശ് തിലക് എന്നിവരും അഭിനയിച്ച ഈ ചിത്രത്തിന് ക്യാമറ ചലിപ്പിച്ചിരിക്കുന്നതു സത്യൻ സൂര്യനും ഈ ചിത്രത്തിന്റെ എഡിറ്റിംഗ് നിർവഹിക്കുന്നതു ഫിലോമിൻ രാജുമാണ്. ഇവർ തന്നെയാണ് ലോകേഷിന്റെ മുൻചിത്രമായ കൈദിയിലും ജോലി ചെയ്തത്. ബിഗിൽ എന്ന ബ്ലോക്ക്ബസ്റ്റർ ആറ്റ്ലി ചിത്രത്തിന് ശേഷമെത്തുന്ന ഈ വിജയ് ചിത്രവും വമ്പൻ വിജയമായിരിക്കും എന്ന പ്രതീക്ഷയിലാണ് ആരാധകർ.