കരുത്തുറ്റകഥാപാത്രങ്ങളായി ഉണ്ണി മുകുന്ദനും ഗോകുൽ സുരേഷും; ‘ഇര’ഫസ്റ്റ്ലുക്ക് പോസ്റ്റർ പുറത്ത്

ഉണ്ണി മുകുന്ദൻ, ഗോകുൽ സുരേഷ് എന്നിവരെ നായകകഥാപാത്രങ്ങളാക്കി നവാഗതനായ സൈജു എസ് സംവിധാനം ചെയ്യുന്ന ചിത്രമാണ് ‘ഇര’. ചിത്രത്തിന്റെ ഫസ്റ്റ്ലുക്ക് പോസ്റ്റർ അണിയറപ്രവർത്തകർ പുറത്തുവിട്ടു. ഉണ്ണി മുകുന്ദന്റെയും ഗോകുൽ സുരേഷിന്റെയും മുഖത്തിന്റെ പകുതി ഭാഗങ്ങൾ പ്രത്യേകരീതിയിൽ ചിത്രീകരിച്ചുകൊണ്ടാണ് ഫസ്റ്റ്ലുക്ക് പോസ്റ്റർ പുറത്തുവിട്ടിരിക്കുന്നത്. കരുത്തുറ്റകഥാപാത്രങ്ങളെയാണ് ഇരുവരും ചിത്രത്തിൽ അവതരിപ്പിക്കുന്നതെന്നാണ് സൂചന. ‘സ്റ്റോറി ഓഫ് ആൻ അക്യൂസ്‌ഡ്‌’ എന്നാണ് ചിത്രത്തിന്റെ ടാഗ് ലൈൻ.

ചെയ്യാത്ത കുറ്റത്തിന് പോലീസ് കുറ്റവാളിയാക്കുന്ന ഒരു യുവാവിന്‍റെ കഥയാണ് സിനിമയുടെ പ്രമേയമെന്നും ഇതിനെതിരെയുള്ള യുവാവിന്‍റെ പോരാട്ടവും ഒരു സ്ത്രീയുടെ പ്രതികാരവും സിനിമയിൽ വിഷയമാകുന്നുണ്ടെന്നാണ് സൂചന. ഉണ്ണി മുകുന്ദനും ഗോകുൽ സുരേഷും ഇതിനു മുൻപ് മമ്മൂട്ടി നായകനായെത്തിയ ‘മാസ്റ്റർപീസി’ൽ ഒരുമിച്ചു അഭിനയിച്ചിരുന്നു. ഇരുവരും വീണ്ടും ഒന്നിക്കുന്ന ചിത്രമാണ് ‘ഇര’. ഇവരോടൊപ്പം മിയ, ലെന, നിരഞ്ജന നീരജ, മറീന, അലൻസിയർ, ശങ്കർ രാമകൃഷ്ണൻ, കൈലാസ്‌ തുടങ്ങി മുപ്പതോളം താരങ്ങളും ചിത്രത്തില്‍ അഭിനയിക്കുന്നുണ്ട്.

സംവിധായകൻ വൈശാഖും തിരക്കഥാകൃത്തു ഉദയ കൃഷ്ണയും ചേർന്ന് ആദ്യമായി നിർമ്മിക്കുന്ന ചിത്രമാണ് ‘ഇര’. നവീൻ ജോൺ ആണ് തിരക്കഥ എഴുതുന്നത്. ഛായാഗ്രഹണം സുധീർ സുരേന്ദ്രൻ നിർവഹിക്കുന്നു. ഗോപി സുന്ദറാണ് ചിത്രത്തിലെ ഗാനങ്ങൾക്ക് ഈണം നൽകുന്നത്.