തന്ത്രശാലിയായ പോരാളിയായി ഉണ്ണി മുകുന്ദന്റെ ‘ചാണക്യതന്ത്രം’

ഉണ്ണിമുകുന്ദനെ നായകനാക്കി കണ്ണന്‍ താമരക്കുളം സംവിധാനം ചെയ്യുന്ന ചിത്രത്തിന് ‘ ചാണക്യതന്ത്രം’ എന്ന് പേരിട്ടു. ബിഗ് ബജറ്റിൽ ഒരു ആക്ഷന്‍ ത്രില്ലറായി ഒരുക്കുന്ന ഈ ചിത്രത്തിൽ ചാണക്യനെ അനുസ്മരിപ്പിക്കുന്ന തന്ത്രശാലിയായ പോരാളിയായാണ് ഉണ്ണി മുകുന്ദൻ എത്തുക. നടനും തിരക്കഥാകൃത്തുമായ അനൂപ് മേനോനും ഉണ്ണി മുകുന്ദനോടൊപ്പം ഒരു പ്രാധാന്യമുള്ള വേഷം അവതരിപ്പിക്കുന്നുണ്ട്.

ശിവദ, ശ്രുതി രാമചന്ദ്രന്‍, സായ്കുമാര്‍, രമേഷ് പിഷാരടി, ഹരീഷ് കണാരന്‍, സമ്പത്ത്, ജയന്‍ ചേര്‍ത്തല, ധര്‍മ്മജന്‍ ബോള്‍ഗാട്ടി, ഡ്രാക്കുള സുധീര്‍, നിയാസ്, മുഹമ്മദ് ഫൈസല്‍, അരുണ്‍, സോഹന്‍ സീനുലാല്‍, എന്നിങ്ങനെ ഒരു വൻ താരനിര തന്നെ ചിത്രത്തിനായി അണിനിരക്കുന്നുണ്ട്.

ആടുപുലിയാട്ടം, അച്ചായന്‍സ് എന്നീ ചിത്രങ്ങൾക്ക് ശേഷം കണ്ണന്‍ താമരക്കുളം സംവിധാനം ചെയ്യുന്ന ഈ ചിത്രത്തിന്റെ തിരക്കഥ നിർവഹിക്കുന്നത് ‘ആടുപുലിയാട്ട’ത്തിന്‍റെ തന്നെ തിരക്കഥാകൃത്തായ ദിനേശ് പളളത്താണ്. കൈതപ്രത്തിന്റെ വരികൾക്ക് ഷാൻ റഹ്മാനാണ് സംഗീതം നൽകുന്നത്. പ്രദീപ് നായരാണ് ഛായാഗ്രഹണം.

അതേസമയം സൈജു എസ് സംവിധാനം ചെയ്യുന്ന ഇര എന്ന ചിത്രത്തിലാണ് ഉണ്ണി മുകുന്ദൻ ഇപ്പോൾ അഭിനയിച്ചുകൊണ്ടിരിക്കുന്നത്. സംവിധായകന്‍ വൈശാഖും തിരക്കഥാകൃത്ത് ഉദയകൃഷ്ണയും ചേർന്നാണ് ചിത്രം നിർമ്മിക്കുന്നത്. മമ്മൂട്ടിയുടെ കൂടെ മാസ്റ്റര്‍ പീസ്, അനുഷ്‌കാ ഷെട്ടിയുമൊത്ത് ഭാഗ്മതി എന്നിവയാണ് ഉണ്ണിയുടെ പുറത്തിറങ്ങാനിരിക്കുന്ന ചിത്രങ്ങള്‍. ജോൺ തെക്കൻ എന്ന പോലീസ് ഓഫീസറുടെ വേഷത്തിലാണ് മാസ്റ്റർ പീസിൽ ഉണ്ണി മുകുന്ദൻ പ്രത്യക്ഷപ്പെടുക.