പ്രതീക്ഷ വർദ്ധിപ്പിക്കുന്ന ഗാനങ്ങളുമായി ഉദാഹരണം സുജാത..!

ഒരുപാട് പ്രതീക്ഷകൾ പ്രേക്ഷകർ വെച്ച് പുലർത്തുന്ന ചിത്രം ആണ് മഞ്ജു വാര്യർ നായിക ആയെത്തുന്ന ഉദാഹരണം സുജാത. നവാഗതനായ ഫാന്റം പ്രവീൺ സംവിധാനം ചെയ്ത ഈ ചിത്രം ഈ വരുന്ന സെപ്റ്റംബർ 28 നു കേരളത്തിലെ തീയേറ്ററുകളിൽ എത്തുകയാണ്. മഞ്ജു വാര്യർ എന്ന നടിയുടെ വിസ്മയിപ്പിക്കുന്ന പ്രകടനമാണ് ഈ ചിത്രത്തിന്റെ ഏറ്റവും വലിയ ഹൈലൈറ്റ് എന്നാണ് ചിത്രത്തിന്റെ അണിയറയിൽ നിന്ന് ലഭിക്കുന്ന വിവരങ്ങൾ. മഞ്ജുവിന്റെ അഭിനയ ജീവിതത്തിലെ ഒരു പൊൻതൂവൽ ആയി മാറിയേക്കാവുന്ന കഥാപാത്രം ആണ് ചേരി നിവാസിയും വിധവയും ഒരു പെൺകുട്ടിയുടെ അമ്മയുമായ സുജാത എന്ന കഥാപാത്രം എന്നാണ് റിപ്പോർട്ടുകൾ പറയുന്നത്. ചിത്രത്തിന്റെ ട്രെയ്‌ലറും പുറത്തിറങ്ങിയ ഒരു ഗാനവും പ്രേക്ഷകർ ഇരു കയ്യും നീട്ടി സ്വീകരിച്ചിരുന്നു. ഇപ്പോഴിതാ പ്രതീക്ഷകൾ വർദ്ധിപ്പിച്ചു കൊണ്ട് ചിത്രത്തിലെ പുതിയ ഒരു ഗാനം കൂടി റിലീസ് ചെയ്തിരിക്കുകയാണ്.

ഗോപി സുന്ദർ ആണ് ഈ ചിത്രത്തിന് വേണ്ടി സംഗീത സംവിധാനം നിർവഹിച്ചിരിക്കുന്നത്. പ്രശസ്ത സംവിധായകൻ ആയ മാർട്ടിൻ പ്രക്കാട്ടും നടൻ ജോജു ജോര്ജും ചേർന്നാണ് ഈ ചിത്രം നിർമ്മിച്ചിരിക്കുന്നത്. മഞ്ജു വാര്യർക്കൊപ്പം നെടുമുടി വേണു, ജോജു ജോർജ്, അലെൻസിയർ, മമത മോഹൻദാസ് എന്നിവരും ഈ ചിത്രത്തിന്റെ ഭാഗമാണ്. മധു നീലകണ്ഠൻ ദൃശ്യങ്ങൾ ഒരുക്കിയ ഈ ചിത്രം എഡിറ്റ് ചെയ്തിരിക്കുന്നത് മഹേഷ് നാരായണൻ ആണ്.