വമ്പൻ ഹിറ്റിനു ശേഷം ഒരു കൊച്ചു ചിത്രവുമായി ഉദയ കൃഷ്ണ സ്റ്റുഡിയോസ്; ഷിബുവിൽ പ്രതീക്ഷയേറുന്നു..!

മലയാളത്തിലെ ഏറ്റവും തിരക്കുള്ള തിരക്കഥാകൃത്തുക്കളിൽ ഒരാളാണ് ഉദയ കൃഷ്ണ. മലയാള സിനിമയിലെ നിലവിലെ ഏറ്റവും വലിയ വിജയം ആയ പുലി മുരുകൻ രചിച്ചതും ഉദയ കൃഷ്ണ ആണ്. അദ്ദേഹം ആരംഭിച്ച വിതരണ കമ്പനി ആണ് ഉദയ കൃഷ്ണ സ്റ്റുഡിയോസ്. അദ്ദേഹം തന്നെ രചിച്ച മാസ്റ്റർപീസ്, മധുര രാജ എന്നീ ചിത്രങ്ങൾ കേരളത്തിൽ വിതരണം ചെയ്തതും ഉദയ കൃഷ്ണ സ്റ്റുഡിയോസ് ആണ്. ഇപ്പോഴിതാ മധുര രാജ എന്ന ചിത്രം നേടിയ ബ്രഹ്മാണ്ഡ വിജയത്തിന് ശേഷം ഒരു കൊച്ചു സിനിമ വിതരണം ചെയ്യാൻ പോവുകയാണ് ഉദയ കൃഷ്ണ സ്റ്റുഡിയോസ്. നവാഗതനായ കാർത്തിക് രാമകൃഷ്ണൻ നായകനായി എത്തുന്ന ഷിബു എന്ന ചിത്രമാണത്. ഉദയ കൃഷ്ണ സ്റ്റുഡിയോസ് വിതരണം ഏറ്റെടുത്തതോടെ ഈ കൊച്ചു സിനിമയിൽ ഉള്ള പ്രേക്ഷക പ്രതീക്ഷ വർധിച്ചിരിക്കുകയാണ് എന്ന് തന്നെ പറയാം.

ഒരു കടുത്ത ദിലീപ് ആരാധകന്റെ കഥ പറയുന്ന ഈ ചിത്രം സംവിധാനം ചെയ്തിരിക്കുന്നത് 32-ാം അധ്യായം 23-ാം വാക്യം എന്ന ചിത്രത്തിന് ശേഷം അര്‍ജുന്‍ പ്രഭാകരന്‍, ഗോകുല്‍ രാമകൃഷ്ണന്‍ എന്നിവര്‍ ചേര്‍ന്ന് ആണ്. പ്രണീഷ് വിജയൻ തിരക്കഥ ഒരുക്കിയിരിക്കുന്ന ഈ ചിത്രത്തിന്റെ പോസ്റ്ററുകൾ, ടീസർ എന്നിവയെല്ലാം മികച്ച പ്രേക്ഷക ശ്രദ്ധ നേടിയെടുത്തിട്ടുണ്ട്. കാര്‍ഗോസ് സിനിമാസ് നിർമ്മിച്ചിരിക്കുന്ന ഈ ചിത്രത്തിന് സംഗീതം ഒരുക്കിയത് സച്ചിൻ വാര്യരും കാമറ ചലിപ്പിച്ചിരിക്കുന്നതു സജിത്ത് പുരുഷനും ആണ്. ദിലീപ് ഡെന്നിസ് ആണ് ഈ ചിത്രം എഡിറ്റ് ചെയ്തിരിക്കുന്നത്. അധികം വൈകാതെ തന്നെ ഷിബു തീയേറ്ററുകളിൽ എത്തുമെന്നാണ് സൂചന.