ലൂസിഫർ പോലെയല്ല ടൈസൺ; ഇത് മറ്റൊരു തരത്തിലുള്ള ചിത്രം; വെളിപ്പെടുത്തി പൃഥ്വിരാജ്

മോഹൻലാൽ നായകനായ ലൂസിഫർ, ബ്രോ ഡാഡി എന്നെ വമ്പൻ വിജയങ്ങൾ സംവിധാനം ചെത് കൊണ്ട്, തെന്നിന്ത്യ മുഴുവൻ ശ്രദ്ധ നേടിയ സംവിധായകൻ കൂടിയാണ് ഇന്ന് മലയാളത്തിന്റെ യുവ സൂപ്പർ താരമായ പൃഥ്വിരാജ് സുകുമാരൻ. ഇപ്പോഴിതാ തന്റെ മൂന്നാമത്തെ ചിത്രമായ, മോഹൻലാൽ തന്നെ നായകനായ എംപുരാൻ അടുത്ത വർഷം ആദ്യം തന്നെ ആരംഭിക്കാനുള്ള ഒരുക്കത്തിലാണ് അദ്ദേഹം. എന്നാൽ അതിനു മുൻപ് തന്നെ താൻ സംവിധാനം ചെയ്യാൻ പോകുന്ന നാലാമത്തെ ചിത്രവും പൃഥ്വിരാജ് പ്രഖ്യാപിച്ചു കഴിഞ്ഞു. പൃഥ്വിരാജ് തന്നെ നായക വേഷവും ചെയ്യുന്ന ഈ ചിത്രം രചിക്കുന്നത് മുരളി ഗോപിയും നിർമ്മിക്കുന്നത് കെ ജി എഫ് സീരിസ് നിർമ്മിച്ച ഹോംബാലെ ഫിലിംസുമാണ്. ടൈസൺ എന്നാണ് ഇതിനു നൽകിയിരിക്കുന്ന പേര്. ഇപ്പോഴിതാ ഈ ചിത്രത്തെ കുറിച്ച് കൂടുതൽ വെളിപ്പെടുത്തുകയാണ് പൃഥ്വിരാജ്. ദി ക്യൂവിനു നൽകിയ അഭിമുഖത്തിലാണ് അദ്ദേഹം ഇത് പറയുന്നത്.

ലൂസിഫർ പോലെ ഒരു ചിത്രമല്ല ടൈസൺ എന്നും, പക്ഷെ ആക്ഷന് പ്രാധാന്യമുള്ള ഒരു സോഷ്യൽ ത്രില്ലർ പോലെയാവും ഇതൊരുക്കുകയെന്നും പൃഥ്വിരാജ് പറയുന്നു. ഇന്ത്യയിലെ തന്നെ ഒട്ടേറെ സ്ഥലത്തായി നടക്കുന്ന ഒരു കഥയാണ് ഇതിന്റേതെന്നും പൃഥ്വിരാജ് വെളിപ്പെടുത്തി. ലൂസിഫർ എന്ന ചിത്രം കാരണമാണ് ടൈസൺ സംഭവിച്ചതെന്നും ലൂസിഫർ നേടിയ മഹാവിജയം കണ്ടാണ് ഹോംബാലെ ഫിലിംസ് തന്നെ സമീപിച്ചതെന്നും പൃഥ്വിരാജ് വിശദീകരിക്കുന്നുണ്ട്. 2023ല്‍ ചിത്രീകരണം ആരംഭിച്ച് 2024ല്‍ ടൈസൺ റിലീസ് ചെയ്യാനാണ് ആലോചിക്കുന്നതെന്നു നേരത്തെ പൃഥ്വിരാജ് ടൈംസ് ഓഫ് ഇന്ത്യയോട് പറഞ്ഞിരുന്നു. ടൈസണ് ശേഷം മോഹൻലാൽ തന്നെ നായകനാവുന്ന ലൂസിഫർ 3 ആണ് പൃഥ്വിരാജ് ഒരുക്കുക.