റീലീസിൽ അടിയുറച്ചു സുനാമി ടീം; ചിത്രം മാർച്ച് പതിനൊന്നിന് തന്നെയെത്തും..!

നടനും സംവിധായകനുമായ ലാലും അദ്ദേഹത്തിന്റെ മകനായ ജീൻ പോൾ ലാലും ഒരുമിച്ചു സംവിധാനം ചെയ്ത സുനാമി എന്ന ചിത്രം നേരത്തെ പ്രഖ്യാപിച്ചത് പോലെ ഈ വരുന്ന മാർച്ച് 11 നു തന്നെ റിലീസ് ചെയ്യും. സർക്കാർ സെക്കന്റ് ഷോ അനുവദിച്ചില്ലെങ്കിലും ചിത്രത്തിന്റെ റിലീസ് മാറ്റില്ല എന്ന ഉറച്ച നിലപാടിലാണ് സുനാമി ടീം. പല പ്രമുഖ ചിത്രങ്ങളും സെക്കന്റ് ഷോ നടത്താനുള്ള അനുമതി ലഭിക്കാതെയിരുന്നപ്പോൾ, തങ്ങൾ നേരത്തെ പ്രഖ്യാപിച്ച റിലീസ് തീയതികളിൽ നിന്നും പിന്മാറിയിരുന്നു. അപ്പോഴാണ് സുനാമി ടീം തങ്ങളുടെ തീരുമാനത്തിൽ അടിയുറച്ചു നിന്നു കൊണ്ട് ശ്രദ്ധ നേടുന്നത്. പ്രശസ്ത നടനായ ഇന്നസെന്റിന്റെ കഥയിൽ നിന്നാണ് സുനാമി എന്ന ഈ ചിത്രം പിറക്കുന്നത്. ഒരു യഥാർഥ കഥയിൽ നിന്നും രൂപം കൊണ്ട ഈ ചിത്രം പ്രേക്ഷകരെ പൊട്ടിച്ചിരിപ്പിക്കുന്ന ഒരു ഫാമിലി എന്റർടൈനേർ ആയിരിക്കും. ചിത്രത്തിന്റെ ടീസറുകളും ഇതിലെ ഒരു ഗാനവും സൂപ്പർ ഹിറ്റായിക്കഴിഞ്ഞു.

പാണ്ട ഡാഡ് പ്രൊഡക്ഷൻസിന്റെ ബാനറിൽ അലൻ ആന്റണി നിർമ്മിച്ച ഈ കോമഡി ഫാമിലി എന്റെർറ്റൈനെറിൽ ഒരു വലിയ താരനിര തന്നെയണിനിരന്നിട്ടുണ്ട്. ഇന്നസെന്റ്, മുകേഷ്, അജു വർഗീസ്, ബാലു വർഗീസ്, സുരേഷ് കൃഷ്ണ, ബിനു അടിമാലി, ആരാധ്യ ആൻ, അരുൺ ചെറുകാവിൽ, ദേവി അജിത്, നിഷ മാത്യു, വത്സല മേനോൻ, സിനോജ് വർഗീസ്, സ്മിനു എന്നിങ്ങനെ ഒട്ടേറെ പ്രശസ്ത കലാകാരൻമാർ ഈ ചിത്രത്തിന്റെ ഭാഗമാണ്. അലക്‌സ് ജെ പുളിക്കൽ ഛായാഗ്രഹണവും രതീഷ് രാജ് എഡിറ്റിംഗും നിർവഹിച്ചിരിക്കുന്ന ഈ ചിത്രത്തിന് യക്സൻ ഗാരി പെരേരയും നേഹ എസ് നായരും ചേർന്നാണ് സംഗീതമൊരുക്കിയത്. സംവിധായകൻ ലാൽ തന്നെയാണ് ഈ ചിത്രത്തിൻറെ തിരക്കഥ രചിച്ചിരിക്കുന്നത്.