രണ്ട് ദിനം കൊണ്ട് 15 കോടിയും കടന്ന് അജയന്റെ രണ്ടാം മോഷണം; ബ്ലോക്ക്ബസ്റ്റർ ഹിറ്റിലേക്ക് ടോവിനോ ചിത്രം

ടോവിനോ തോമസ് നായകനായ അജയന്റെ രണ്ടാം മോഷണം എന്ന ബിഗ് ബഡ്ജറ്റ് ഫാന്റസി ആക്ഷൻ എന്റെർറ്റൈനെർ ചിത്രം പ്രേക്ഷകരുടെ കയ്യടികൾ നേടിക്കൊണ്ട് ബ്ലോക്ക്ബസ്റ്റർ വിജയത്തിലേക്കാണ് കുതിക്കുന്നത്. ടു ഡി, ത്രീഡി ഫോർമാറ്റുകളിൽ റിലീസ് ചെയ്ത ഈ ചിത്രം എല്ലാത്തരം പ്രേക്ഷകരെയും ആകർഷിക്കുന്നുണ്ട്. ബോക്സ് ഓഫീസിൽ മിന്നുന്ന പ്രകടനമാണ് അജയന്റെ രണ്ടാം മോഷണം കാഴ്ചവെക്കുന്നത്.

ആദ്യ ദിനം ആഗോള തലത്തിൽ ആറേകാൽ കോടിയോളം ഗ്രോസ് നേടിയ ഈ ചിത്രം ആദ്യ രണ്ട് ദിനം പിന്നിടുമ്പോൾ ആഗോള ഗ്രോസ് 15 കോടിക്ക് മുകളിൽ നേടിക്കഴിഞ്ഞു എന്നാണ് ട്രേഡ് അനലിസ്റ്റുകൾ റിപ്പോർട്ട് ചെയ്യുന്നത്. ആദ്യ ദിനം കേരളത്തിൽ നിന്ന് 2 കോടി 80 ലക്ഷത്തോളം നേടിയ ചിത്രം രണ്ടാം ദിനം 2 കോടി 90 ലക്ഷത്തോളമോ അതിനു മുകളിലോ നേടികാണുമെന്നാണ് ആദ്യ കണക്കുകൾ വെളിവാക്കുന്നത്. കേരളത്തിന് പുറമെ ഗൾഫ് ഉൾപ്പെടെയുള്ള വിദേശ മാർക്കറ്റുകളിലും മികച്ച പ്രകടനമാണ് ചിത്രം നടത്തുന്നത്.

ടോവിനോ തോമസിന്റെ കരിയറിലെ ഏറ്റവും മികച്ച രണ്ടാമത്തെ ഓപ്പണിങ് ആണ് ARM നേടിയിരിക്കുന്നത്. നവാഗതനായ ജിതിൻ ലാൽ ഒരുക്കിയ ഈ ചിത്രം രചിച്ചിരിക്കുന്നത് സുജിത് നമ്പ്യാരും, നിർമ്മിച്ചിരിക്കുന്നത് മാജിക് ഫ്രെയിംസ്, യു.ജി.എം മോഷൻ പിക്ചേഴ്സ് എന്നീ ബാനറുകളിൽ ലിസ്റ്റിൻ സ്റ്റീഫൻ, ഡോ. സക്കറിയ തോമസ് എന്നിവർ ചേർന്നുമാണ്. ടോവിനോക്കൊപ്പം കൃതി ഷെട്ടി, ഐശ്വര്യ രാജേഷ്, സുരഭി ലക്ഷ്മി, ബേസിൽ ജോസഫ്, ജഗദീഷ്, ഹരീഷ് ഉത്തമൻ, ഹരീഷ് പേരടി, പ്രമോദ് ഷെട്ടി, രോഹിണി എന്നിവരും ചിത്രത്തിന്റെ താരനിരയിലുണ്ട്.