ഫോറൻസിക് ടീമിന്റെ ബിഗ് ബഡ്ജറ്റ് ത്രില്ലർ ഐഡന്റിറ്റി ആരംഭിച്ചു; ഒരുങ്ങുന്നത് രണ്ട് ഭാഗങ്ങളായി?

ഫോറൻസിക് എന്ന സൂപ്പർ ഹിറ്റ് ചിത്രത്തിന് ശേഷം, അഖിൽ പോൾ- അനസ് ഖാൻ ടീം ഒരുക്കുന്ന പുതിയ ചിത്രമായ ഐഡന്റിറ്റിയുടെ ചിത്രീകരണം ആരംഭിച്ചു. യുവ താരം ടോവിനോ തോമസ് നായകനായി എത്തുന്ന ഈ ചിത്രം വമ്പൻ ബഡ്ജറ്റിലാണ് ഒരുക്കുന്നത്. ടോവിനോ തോമസിനൊപ്പം വമ്പൻ താരനിരയാണ് ഈ ചിത്രത്തിൽ അണിനിരക്കുന്നത്. തെന്നിന്ത്യൻ സൂപ്പർ നായികാ താരം തൃഷ, പ്രശസ്ത തമിഴ് നടൻ വിനയ് റായ്, ബോളിവുഡ് താരം മന്ദിര ബേദി എന്നിവരും ഈ ചിത്രത്തിലെ നിർണ്ണായക വേഷങ്ങൾ അവതരിപ്പിക്കും. ഗോവയിൽ ചിത്രീകരണം ആരംഭിച്ച ഈ ചിത്രത്തിന് ഏകദേശം 120 ദിവസത്തോളമാണ് ഷൂട്ടിംഗ് പ്ലാൻ ചെയ്തിരിക്കുന്നത്. ഏഴ് മാസത്തോളം എടുത്തായിരിക്കും ഐഡന്റിറ്റി പൂർത്തിയാക്കുകയെന്നും ടോവിനോ തോമസ് പങ്ക് വെച്ച സോഷ്യൽ മീഡിയ പോസ്റ്റ് സൂചിപ്പിക്കുന്നു.

ഗോവ, ഉദയ്പൂർ, എറണാകുളം, ബാംഗ്ലൂർ, കോയമ്പത്തൂർ, മുംബൈ, കാശ്മീർ എന്നിവിടങ്ങളിൽ ആയാവും ഈ ചിത്രം ഷൂട്ട് ചെയ്യുക. ഷമ്മി തിലകൻ, അജു വർഗീസ്, അർജുൻ രാധാകൃഷ്ണൻ, അർച്ചന കവി എന്നിവരും വേഷമിടുന്ന ഈ ചിത്രത്തിന് കാമറ ചലിപ്പിക്കുന്നത് അഖിൽ ജോർജ് , എഡിറ്റ് ചെയ്യുന്നത് ചമൻ ചാക്കോ എന്നിവരാണ്. ആദ്യ ഭാഗം പ്രേക്ഷകർ സ്വീകരിക്കുകയാണെങ്കിൽ ഐഡന്റിറ്റിയുടെ രണ്ടാം ഭാഗവും ഒരുക്കാൻ പ്ലാൻ ഉണ്ടെന്നും അണിയറ പ്രവർത്തകർ സൂചിപ്പിച്ചു. സെഞ്ച്വറി ഫിലിംസ്, രാഗം മൂവീസ് എന്നിവർ ചേർന്ന് നിർമ്മിക്കുന്ന ഈ ബിഗ് ബഡ്ജറ്റ് ചിത്രം മലയാളത്തിലാണ് ഒരുക്കുന്നതെങ്കിലും, ഒരു പാൻ ഇന്ത്യൻ ചിത്രത്തിന് വേണ്ട എല്ലാ ചേരുവകളും ഇതിലുണ്ടെന്നും സംവിധായകൻ വിശ്വസിക്കുന്നു. ത്രസിപ്പിക്കുന്ന ആക്ഷൻ രംഗങ്ങളായിരിക്കും ഈ ചിത്രത്തിന്റെ ഹൈലൈറ്റ് എന്നുള്ള സൂചനകളും അവർ തരുന്നുണ്ട്